自從晴晴上咗小學之後，平日可以去玩嘅機會少咗好多喇！
趁住教師發展日唔駛番學，不如貢入去南丫島親親大自然之餘，再深入探索一下漁民文化囉！
由中環4號碼頭乘搭渡輪到榕樹灣，船程約半個鐘，好快就到咗喇！
今次之行，有晴朗舅母陪伴，太好喇！有咩嘢就煩住舅母喇喎！(晴朗媽媽hea mode啟動~XD)
我哋行程係先行下榕樹灣大街小巷，欣賞一下南丫島風光同埋光顧一下特色小店~
好多handmade產品，製作精美，不過由於價格稍高，我哋都只係window shopping~ XDD
混吉完之後，就要預備攀山越嶺喇！Are you READY???
向索罟灣進發！上網做過功課，好似話行大約40分鐘，似乎難度唔太高喎！
響南丫島有好多指示牌，所以唔驚蕩失路呀！Gogogo~
喂喂喂！唔係話去行山㗎咩？
但我哋三個肚似乎被呢間豆腐花店吸引住咗，結果忍唔住坐低嘆下先！
行下食下享受下，咁先似係去旅行加嘛！好啦好啦！3碗豆腐花承惠$36大元~
一碗豆腐花點為之好味？經驗話畀我知，啲豆腐要滑溜溜先正！
出奇地呢間啲豆腐花唔係滑，但就係軟綿綿，而且個糖漿帶有薑味，原來咁樣都好好味喎！
晴晴食到識得跳舞，一定好滿意喇！XD
食飽飽，就梗係要行下消耗番啲卡路里先啦！
經過一段小路，發現南丫島發電廠果3支煙囪呀！
晴晴好似發現新大陸咁！因為佢之前都只係響網上見過咋！*o*
冇幾耐就到達洪聖爺灣泳灘，有泳灘就有廁所，一齊嚟放低幾兩先！XD
天氣好曬，晴晴都換番套短袖衫迎接一陣嘅路程喇！
沿住泳灘隔離嘅小路一直行就可以去到索罟灣，let's GO！
又見到發電廠喇！今次高角度望過去，全面好多呀！
呢段山路好多上斜位，不過好在冇樓梯，都唔算難行，係有啲喘氣啫！@@'''
邊行邊欣賞大自然美妙嘅風景，好舒服呀！
吸收下清新空氣，出啲汗，對於平日少運動嘅香港人嚟講，都唔錯丫！^^
越行越高，呢個角度望向發電廠仲正喎！
繼續向索罟灣進發~
終於行到去涼亭位置，據聞行到嚟呢度就已經行咗一半路程喇！
見有售賣飲品同小吃嘅小檔，買啲嚟嘆下先~
椰青、椰皇、冰菠蘿....簡直係解渴之選！承惠$73大元~
晴晴同舅母感情好好，皆因舅母同晴朗嘅智商差唔多，所以tune到囉！XD
舅母~ 唔好誤會呀！我意思係話妳富有童真咋！XDD
小歇一會，又繼續我哋嘅路程喇！沿途湖光山色盡入眼簾，實在令人心曠神怡~
我哋離發電廠越嚟越遠喇！三支煙囪~ 拜拜~~
落山嘅路途比上山時輕鬆得多呀！
路過一個觀景亭又歇一歇，冇計啦！老人家行得唔耐嘛！抖抖先~
響呢度可以望到索罟灣嘅漁排，而最左手面果排就係我哋一陣間會去嘅「南丫島漁民文化村」喇！
終於行到嚟位於索罟灣嘅蘆鬚城村喇！
我哋用咗1小時多啲，乜唔係話只需40分鐘㗎咩？
不過我哋有老有嫩，差唔多啦！^^'''
呢間屋畫咗隻大肥豬，好特別呀！
響我哋右手邊係已經荒廢咗十幾年嘅蘆鬚城學校，再行冇幾遠就會到達神風洞~
晴晴背後就係神風洞喇！據聞島上有多個呢啲岩洞，係二次大戰時日軍用嚟收埋啲快艇打仗用㗎！
索罟灣有好多海鮮檔，嚟到呢度係咪一定要食海鮮㗎呢？
答案梗係唔係啦！我哋都係比較鍾意食番啲港式同西式嘢多啲~
呢間係索罟灣唯一一間唔係食海鮮嘅食店，其實我只係想食番碗公仔麵啫！都咁難~ @@'''
雖然呢邊冇茶餐廳，但食物都算唔錯啦！
不過可能獨巿關係，承惠$247大元...
舅母話有點兒乸脷，但出嚟玩，啲錢最緊要洗得開心，係咪先？
食飽飽又去玩過囉！去南丫島漁民文化村之前要先到呢間賣紀念品嘅小店度購票~
文化村門票：小童$60，成人$80，承惠$220大元~
呢頭買飛，果頭就有船嚟接我哋喇！效率都好快喎！@.@
又可以坐船仔，晴晴心情好舒暢，繼續維持happy mode啦！
不過船程只需1分鐘，真係話咁快就到！
踏上漁排，就係南丫島漁民文化村喇！
晴晴話錯喎！
加埋佢，應該係南丫島漁民「大」文化村先啱喎！
OK！You WIN!!! ~.~'''
一嚟就有兩艘龍舟嚟迎接，乜原來龍頭兩條觸鬚都咁好玩㗎咩？
不如上埋船打鼓囉！咚咚咚咚~
旁邊亦有三艘舢舨可供拍照，扮下嘢先~
知唔知呢啲係咩嚟呢？係....
南丫島沿海一帶打撈番嚟嘅昆布呀！
以前好多漁民就係用呢啲漁船出海捕漁㗎喇！
原來船上面有好多機關，唔同位置都可以打開作唔同用途~
好似呢格咁丫！就係用嚟儲存啲漁獲用㗎喇！
漁船除咗用嚟捕漁之外，仲係漁民嘅屋企，入到去有分主人房同仔女嘅房~
導賞哥哥「撈麵」叫晴晴估下呢個葫蘆用嚟做咩？
晴晴攞起上手就不停搖，話係沙槌~
no no no... 唔啱呀！
原來以前啲漁民會用呢個葫蘆綁住啲BB或者小朋友，驚佢哋唔小心跌落水都可以當水泡咁用嘛！
咁又係嘅！以前啲人一生就生十個八個，邊睇得咁多，加個安全措施安心啲~
船內有睡房又有廚房，我哋好似睇梗示範單位咁呀！XD
廚房隔離有兩個大水缸，係用嚟儲存淡水用㗎！
再隔離就係廁所，你哋估下廁所係點樣去法㗎呢？賣個關子先~^^
去到船頂，可以望番落去駕駛室~
亦都可以望到個廁所，雖然黑鼆鼆，但應該都見到個癃卦？
係蹲廁嚟呀！直接痾落大海就ok...
天然嘅嘢回歸番大自然，就係咁簡單！^^
參觀完漁船，不如動下腦筋，學下漁民話囉！
呢度有好多木牌，好似中秋猜燈迷咁，前面係迷面，後面就係迷底~
畀兩個大家估下丫！迷面係「反正無咩嘢做，我去未椅啦！」
迷底係...「反正沒什麼事，我去潛水捉魚啦！」
哈哈！估到嘛？
再考大家一題~
迷面係「今日天色麻麻，我地殺麻就收頭。」
迷底係....「今天天氣不是很好，天黑時份就要回航。」
我哋覺得啲漁民話好有趣，仲好玩過猜燈迷呀！^o^
跟住撈麵哥哥帶我哋去餵魚區，認識唔同品種嘅魚~
晴晴問點解唔見有魚嘅？
想睇多啲魚，好簡單啫！掉啲魚餌落去就見到㗎喇！
嘩！睇下幾多魚蒲晒上嚟？*o*
撈麵哥哥帶我哋睇嘅魚越睇越大條，重頭戲嚟喇！
見唔見到係咩嘢魚呀？呢度連魔鬼魚都有，勁呀！
嚟到導賞最後一站，亦係晴晴最期待㗎！
響呢個水池會見到好多奇怪有趣嘅海洋生物~
隔一排又會換過一啲新嘅生物，都係啲漁民出海果陣發現然後帶番嚟㗎！
呢隻蟹好似我哋食開嘅麵包蟹咁，好乖呀！放番落水之後，就會掘沙將自己埋藏，好可愛~
晴晴大叫：「嘩！係海星呀！」
撈麵哥哥見晴晴咁有興趣，一撈就撈咗粒海星上嚟！而且仲...
畀晴晴攞上手摸下，超興奮呀！*o*
一直都以為海星係軟淋淋嘅東西，原來摸落去係硬㗎！
認真大開眼界！@o@
水池裡面仲有好多其他得意嘢！好似有翼嘅飛魚、肥嘟嘟雞泡魚、好惡嘅花蟹、好特別嘅蟹仔~
仲有大龍蝦，原來龍蝦係向前行，游水就向後游㗎！@.@
9月果陣山竹颱風過後，支架上面嘅頂部同埋有幾間觀賞屋仔都被吹走晒唔知去晒邊度喇！
文化村亦都好多魚唔係游走晒就死晒，大自然嘅威力真係好無情呀！X_x
門票包咗每人玩一次無鈎釣魚，何謂無鈎？
即係將釣魚杆前頭嘅繩索套實一條魚餌，然後就可以去釣魚，咁就唔會整傷啲魚啦！
嘩！睇下成群魚幾咁虎視眈眈？
為咗令大家深入了解釣況，我哋有請晴朗舅母同晴晴幫手示範一下~
由於內容含有大量不雅用語，家長請陪同子女收看~XD
其實呢個遊戲係想讓遊客感受一下同魚角力時果個力量，原來啲魚好大力㗎！
晴朗媽媽都試玩咗兩次，太刺激喇！不過都係釣唔到上嚟！
撈麵哥哥話如果釣到上嚟係可以帶番屋企㗎！
曾經試過一團旅行團嚟到帶走咗50條魚，技術超凡呢！
玩完釣魚就係自由時間囉！響漁排上到處看看，十分悠閒自在~
晴晴好鍾意呢個木鞦韆，搖呀搖，搖到去外婆橋~
同晴晴一齊搖，好開心呀！不過聽到個鞦韆發出「e...e...」嘅聲音~
睇嚟係晴朗媽媽減肥嘅響號喇！@.@
望住港島南區嘅優美景色，真係好梳乎喔~
去玩之餘，又學到嘢！仲做埋運動添！今日認真滿載而歸喇！
香港咁多個離島之中，南丫島被列入晴朗媽媽最喜愛選單之內。我鍾意呢度嘅風土人情，同埋寧靜嘅環境。都巿人日日都咁繁忙，有空能夠入嚟南丫島行下，係唔錯嘅選擇呀！
耐耐哋冇入嚟！唔知係咪有工程關係，榕樹灣多咗好多運送貨物嘅小貨車來來往往，帶住小朋友行兩行就要停一停、避一避，有啲唔爽呀！索罟灣果邊冇見到呢啲小貨車，感覺就好一啲。大家如果有興趣到漁民文化村，大可以由中環搭船直接到索罟灣。我哋係因為想行埋山，所以先由榕樹灣開始起行。不過如果去行山，記得要帶多套衫畀小朋友替換，小朋友跑跑跳跳始終比較大汗嘛！
南丫島漁民文化村嘅門票除咗可在索罟灣購買之外，亦都可以響佢哋網站預先訂購。有撈麵哥哥細心嘅講解，我哋除咗對漁民生活文化了解多咗之外，亦都學識多咗海洋生物嘅知識，仲學埋漁民話添！不過現今已經越嚟越少漁民喇！遲下可能會發展到唔駛捕漁都有魚食囉！科技發展一日千里，真係好難講㗎！希望漁民嘅文化可以一直保存落去，等第時晴朗都可以同佢哋啲仔仔女女分享下啦！實不相瞞，其實晴朗媽媽嘅公公都係漁民嚟！所以更加希望文化能夠保存下去呀！
大家如果嚟嘅話，最好揀平日，冇咁多人嘛！撈麵哥哥話聽日星期六又會有幾百人嘅團嚟參觀喇！呢度真係好值得推介！下次要一家人一齊再嚟過先得呀！
南丫島漁民文化村
地址：南丫島索罟灣養魚區
開放時間：10:15am - 6:00pm (逢星期三及年初一休息)
網址：http://lammafisherfolks.com.hk/tc/
船期：中環來往榕樹灣 / 中環來往索罟灣
FIND US on:
BLOGs:
CONTACT US:
