2017年6月13日 星期二

【健康好味】iBakery 愛烘焙麵包工房

每次經過親曲奇、蛋糕店,總會停一停,睇一睇。買唔買唔係重點,最緊要係齋睇已經覺得好開心!近排經過一間店,被佢哋啲產品深深吸引。而且仲出埋繪本,好啱同小朋友一齊親子閱讀呀!好有意思!一定要介紹畀大家!
iBakery曲奇專賣店位於荃灣悅來坊B1,counter設計得好骨子~


就係畀佢哋啲曲奇吸引咗埋去喇!


包裝好靚,而且仲好有和風味道~


淨係曲奇已經有好多款,同大家逐一介紹下先~


唧花牛油曲奇


全麥杏仁曲奇


腰果曲奇


雙重朱古力曲奇


燕麥合桃曲奇


朱古力腰果曲奇


榛子曲奇


種子提子曲奇


意式脆餅

款款都咁吸引,係咪想試晒佢呢?

禮盒裝就啱晒多心人啦!


一盒已經有齊五款味道~


包括有全麥杏仁曲奇、雙重朱古力曲奇、榛子曲奇、腰果曲奇同埋種子提子曲奇~

除咗雜錦曲奇外,仲有款店舖主打嘅抹茶曲奇~


呢款係佢哋嘅皇牌產品!有分原味同少甜,亦有大盒裝同細盒裝。好啱我呢個綠茶控呀!^^

講完曲奇,不如介紹埋佢哋出嘅蛋糕啦!


貝殼蛋糕 - 有焙茶、抹茶、柚子三款口味。兩款茶味係採用京都老字號茶店「祇園辻利」嘅抹茶及焙茶,而柚子味就用日本直送嘅柚子果醬,經由京都凱悅酒店及香港沙田凱悅酒店之配方和製作指導。果然係一級材料,認真製作!


仲有一款京都抹茶手工蛋糕添呀!睇到我流晒口水~


全部都咁吸引,揀邊款好呢?佢哋啲禮盒都設計得好靚,買番啲嚟送禮都好喎!


連繪本都出埋,我哋又點會錯過呀?梗係要買番去同晴朗一齊睇啦!


番到屋企,唔小心畀晴晴發現咗啲曲奇。櫈都未坐暖,就嚷著要試味~ ^^'''


心多嘅人,唔會買一款,我哋總共買咗四款呀!^o^


抹茶曲奇(少甜) - 來自日本京都抹茶+曲奇配方,味道十分香脆!唔會好甜,而且淡淡嘅綠茶味甘甜融和。用嚟做茶點一流~


意式脆餅 - 由原粒杏仁及腰果製造,加咗啲橙皮丁和檸檬丁,份外清新!口感超脆,而且啲果仁香口味美,簡直停唔到口呀!唔知係咪冇加牛油嘅關係,連晴朗嫲嫲都好鍾意食~


貝殼蛋糕(柚子味) - 加咗牛奶同蜜糖嘅貝殼蛋糕,特別軟綿綿。而且酸酸甜甜,好開胃!


京都抹茶手工蛋糕 - 綠茶味道好濃郁,奇怪嘅係一啲都唔覺甜,但就係好好味!必食推介!


一條蛋糕可以切分成多塊,同屋企人分享特別開心!


全部都好好味!晴晴最鍾意係意式脆餅,而抹茶蛋糕就最令我驚喜喇!

晴朗特別期待今晚嘅故事時間,梗係啦!有新故事聽嘛!


《不完美的小曲奇》- 故事係講述一塊曲奇嘅經歷。過程中,小曲奇雖然已經好努力想變得完美,但結果卻未如理想,仲被同伴排斥。小曲奇去到另一個地方,發現呢個世界原來有各種各樣不同嘅曲奇,每一個都發揮到自己嘅功能,亦從中得到滿足感。小曲奇終於搵到自己存在嘅意義喇!用簡單嘅文字和圖畫帶出咗深遠嘅人生道理,好有意思!


晴朗都好鍾意呢本繪本呀!我哋響閱讀過程中,仲嘗試代入不同角色、不同想法,好好玩!


既可共享親子閱讀時光,又可以做善事,何樂而不為呢?順便可以罐輸埋幫助別人嘅重要訊息畀晴朗呀!

iBakery係屬於東華三院嘅一間社會企業,佢哋訓練同聘用殘障人士。啲咁好味又包裝精緻嘅曲奇同蛋糕就係佢哋整㗎喇!務求造出優質產品,佢哋仲請咗京都凱悅酒店首席餅師嚟到香港指導製作團隊添!好欣賞佢哋果份認真製作嘅精神,仲要係100%本地無添加手工製作㗎!健康味美,十分支持!iBakery除咗曲奇專賣店外,仲有自己嘅烘焙工場、麵包店、餐廳及輕食站,員工當中超過一半都係殘疾人士。雖然有著不同嘅能力,但卻有相同嘅工作熱誠!我哋好想試埋其他曲奇,大家都試試啦!包你食過返尋味呀!


iBakery 愛烘焙麵包工房
網址:http://ibakery.tungwahcsd.org
facebook: https://www.facebook.com/iBakeryhk

iBakery 悅來坊專賣店
地址 : 荃灣荃華街3號悅來酒店悅來坊地庫 (KFC旁)
營業時間 : 12:00 - 20:00 (逢星期一休息)
電話:9341 9727

iBakery 堅尼地城店
地點:堅尼地城域多利道1號百年大樓2座地下2號舖
營業時間:07:00 - 20:00
電話:2816 5233

iBakery 上環店
地點:香港上環普仁街17號東輝花園地下5號
營業時間:08:00 - 18:00 (星期六日及公眾假期休息)
電話:2587 1168

iBakery Gallery Cafe 愛烘焙餐廳
地點:金鐘添馬公園添馬茶座
營業時間:08:00 - 21:00
電話:2352 2700

iBakery Express 愛烘焙輕食站 (添馬公園)
地點:金鐘添馬公園海濱長廊
營業時間:11:00 - 20:00
電話:2511 8230

iBakery Express 愛烘焙輕食站 (香港大學)
地點:香港大學邵逸夫樓地下平台
營業時間:08:00 - 19:00 (星期六日及公眾假期休息)
電話:5402 4546


FIND US on:
     

BLOGs:

CONTACT US: