2017年10月25日 星期三

【吃出健康】AMGD外送健康有營餐盒

好多人減肥都係一味追求瘦削嘅身材,但其實瘦得健康都好重要㗎!對於晴朗媽媽嚟講,減肥係冇特定時間,亦冇特別方法,總之一覺得果排褲頭緊咗喎!就要注意番日常飲食,唔可以畀自己繼續放縱落去。通常節日過後就會係重災區,啱啱過完個中秋,正煩惱梗有咩新方法去減肥嘅時候,就畀我見到AMGD個廣告。一試就試咗10日,想同大家分享一下呀!
來自新加坡嘅AMGD,長寫係「Ahhmahhgawd」,即係「Oh my God!」咁解。佢哋創店係期望每一日都可以將富有心思同意義嘅健康餐分享到世界各地每個城巿,而我就係其中一個品嚐嘅顧客喇!好幸福呢~^^

事不延遲,馬上為大家介紹35款最暢銷餐盒當中嘅其中10款:

Or de Sea (644Kcal)
「OR DE SEA」包括咗露筍蝦卷、沙律菜、蘿蔔、芹菜、提子、提子乾、粟米、烤杏仁,跟埋一兜Spicy Plum。

一打開已經聞到好香,啲蝦夠爽滑彈牙,露筍同其他蔬菜都好新鮮,有nuts好咬口之餘仲多咗份滋味,個汁酸酸甜甜帶少辣,幾開胃,3個卷質感似麵包同蛋糕之間,好特別。食完個餐都幾飽肚,但只係得644卡路里。美中不足嘅係啲紅蘿蔔條太硬,可能係我食唔慣咁生啦!如果切粒可能會好啲。哈哈!


Te Amo! HK (500Kcal)
「Te Amo! HK」包括咗燈籠椒雞捲、沙律菜、火龍果、提子、車厘茄、蘿蔔、栗米、烤杏仁,醬汁同尋日一樣係Spicy Plum。

雞肉味淡但有鮮味,點少少醬汁就變成辣甜酸雞,好好味!雞肉唔嚡口,亦冇肥膏。厚肉有份量,釀埋三色椒在內,好juicy又夠特別!食完肉再嘆埋蔬菜+nuts底,好fresh亦可以消除肉類果種heavy嘅感覺。估唔到個餐有大大件肉都只得500卡路里,都好飽呀!對於鍾意食雞嘅人嚟講,會覺得好滿足!


A Look You Love (459Kcal)
「A Look You Love」包括咗燒牛肉秀珍菇意大利黃青瓜卷、沙律菜、火龍果、藜麥、蘿蔔、提子、士多啤梨、 腰果,醬汁係Ginger-pineapple。

一打開個蓋已經聞到好香,第一次食黃青瓜,睇個樣仲以為係芒果片嚟添!味道爽得嚟質感柔軟,好特別呀!燒牛肉略為凍咗,如果新鮮燒起咁食應該會更加好味。秀珍菇配牛肉,感覺就好似金菇肥牛卷咁,都係我like嘅味道。蔬菜依然係新鮮爽口,食咗兩日杏仁,腰果算係幫我轉轉口味,有nuts配搭埋蔬菜一齊食真係唔錯。初初唔知一粒粒果啲係咩,仲以為係飯嚟!原來叫做「藜麥」,係一啲細細粒類似穀麥嘅小顆粒,冇乜味道,但口感似細粒咗嘅米飯咁,幾過癮。美中不足嘅係唔夠醬汁,食完三件燒牛肉卷已經差不多用晒。下次叫呢款可能要另外加多個sauce喇!459Kcal仲少過之前兩日,但感覺卻比之前飽滿。好神奇呢!


Ruby (545Kcal)
「Ruby」包括咗吞拿魚、沙律菜、芒果粒、龍眼、腰果、紅莓乾、藩西碎(香草),醬汁係Almond & Cucumber Vinaigrette。

三文魚就食得多,吞拿魚真係比較少。估唔到肉質可以咁滑同軟熟,入口即溶,好有驚喜!龍眼肉好甜,芒果都係揀過夠熟嘅品質,鮮甜多汁,連帶埋啲魚油落咗去沙律菜度,唔點sauce食都夠味道。醬汁係以杏仁+黃瓜+醋調製而成,酸酸哋又有瓜菜味,好特別呀!送到嚟嘅時候摸到個底仲暖,但相隔1小時開盒已經攤凍咗!雖然係咁,但依然覺得吞拿魚煮得恰到好處,而新鮮水果就成功帶出咗蔬菜嘅鮮味。讚!545卡路里,多菜少肉,好健康!


Look! (580Kcal)
「Look!」包括咗蜜糖烤雞、沙律菜、紅、青椒、西柚、龍眼、提子、栗米、腰果,醬汁係Ginger-pineapple。

雞肉烤得好香,一打開個蓋就已陣陣撲鼻,不過唔係好食到蜜糖味,但烤到雞皮微焦呢個程度煮得唔錯!如果係新鮮烤起應該會更好味!水果款式又唔同咗!今日係西柚、龍眼、提子等水果一齊帶出蔬菜嘅鮮味。Nuts係腰果,太好喇!我覺得腰果冇杏仁咁硬,易咬啲,純綷個人喜好。Ginger pineapple醬我都幾鍾意,係好有蔬菜水果味嘅一個汁嚟!整體嚟講都OK!美中不足嘅只係烤雞唔係新鮮熱辣原汁原味咁上枱,其餘都配搭得冇得彈!


Naughty And Nice (670Kcal)
「Naughty And Nice」包括咗無骨雞脾肉、蝴蝶粉、沙律菜、車厘茄、燙蘿蔔、蒸西蘭花、核桃、紅莓乾​、紅洋蔥,醬汁係Honey Almond。

雞肉厚肉少油,雖然凍咗,但點上醬汁依然好味!又轉新nuts,今次係核桃,好脆,而且冇苦澀味,有咬口。醬汁香甜,好快被我清晒!好彩仲有紅莓乾同車厘茄吊味,配埋蔬菜一齊放入口都夠甜。沙律菜夠新鮮,食到「索索」聲。燙蘿蔔煮得夠淋,易入口。好like加咗紅洋蔥,輕微嘅蔥辣令到肉和蔬菜都更美味!


Kor Kor (463Kcal)
「Kor Kor」,包括咗香烤芒果配紅椒、芫荽、沙律菜​、雞肉紫菜卷、小紅蘿蔔、開心果、腰果、烤杏仁,醬汁係Roasted sesame。

雞肉類似手撕雞嘅質感,同芝麻醬汁好夾好好味!不過紫菜淋咗啲!當作雞肉紫菜紅米飯咁食都ok!至於烤芒果我就唔太識欣賞,可能本身唔鍾意食煮過嘅水果,但將果肉撈埋落蔬菜度一齊食又唔錯!唔駛落sauce都夠甜,不過依然係有少少失望。今次呢款未必係佢整得唔好,只係唔啱我口味,而沙律菜、nuts同其他配菜都同平日一樣新鮮好味。最緊要係食完咁多嘢都只係得463卡路里,睇見個數字就開心番啦!


FARM (743Kcal)
「FARM」包括咗牛油果蝦紫菜蛋卷​、蕎麥麵、沙律菜、紫椰菜、奇異果、提子、蘿蔔、烤杏仁,醬汁係Wasabi。

蝦肉爽滑彈牙,估唔到牛油果同蝦原來咁夾,好味呀!紫菜雖然淋咗,但同煎蛋夾住咁食又ok唔錯喎!點埋帶微辣嘅芥末醬汁,正!唔知係肚餓定太美味嘅關係,三爬兩撥已經食晒4個卷。之後啲汁仲有剩,倒埋落去沙律菜度一齊食,好鍾意呢個汁。今日又有新水果,奇異果好甜,同提子、沙律菜一齊食好美味,再食埋蕎麥麵認真飽晒呀!


Lights (488Kcal)
Lights」包括咗香烤三文魚、沙律菜、栗米碎、黃莓乾、藍莓、石榴籽、烤杏仁、杏仁片​,醬汁係Spicy Plum。

魚烤得恰到好處,香滑軟熟,魚上嘅杏仁片香脆可口。啲魚油沾咗上啲沙律菜度,感覺上營養就更豐富喇!醬汁裡面有啲一粒粒嘅係石榴籽,每粒入口都爆汁,好juicy!今日又有新水果,係大大粒藍莓呀!好甜!第一次試黃莓乾,甜甜哋又幾特別。我發覺AMGD煮魚真係有一手,入口即溶,好回味!


Let's Walk (391Kcal)
「Let's Walk」包括咗蝦、沙律菜、青蘋果、紅莓乾、黃梅乾、烤杏仁、紫菜碎​,醬汁係Roasted Sesame。

蝦一向煮得爽滑彈牙,依然保持到水準。以前未試過蝦配青蘋果呢個配搭,好特別!水果甜味更加帶出蝦嘅鮮味。一件蝦接住一塊蘋果咁食,點埋芝麻汁,好好味好match!不過食完蝦已經冇晒啲蘋果,之後剩番嘅係紅莓乾同黃梅乾,略嫌水果款式唔夠多,食沙律菜嘅時候唔係好夠味道。不過如果唔係醬怪,一向食開清沙律嘅朋友應該ok嘅!



每日lunch送餐時間係11:30~13:30,而我果區多數11:30~12:15送到,13:00先放lunch,向AMGD查詢過無須放入雪櫃,咁我一夠鐘就打開嚟食,又ok冇變懷喎!唔駛諗每日出去食啲咩又少樣煩惱喇!


每個餐盒上都有張label寫咗客人名稱同餐盒資料,好賓至如歸嘅感覺,服務唔錯!

總括而言,試AMGD可以食到好多之前未接觸過嘅食物,有啲食材冇想過可以用嚟做沙律,但又竟然match到好好味。而且佢哋在研發醬汁方面都花咗唔少心思,啲汁夠晒創新特別。如果要談缺點,就係肉類嚟到已經凍咗,相信新鮮熱辣原汁原味會更好味。如果有啲朋友食慣沙律都係凍凍哋咁食,應該唔成問題。同埋有時食到唔夠汁,如果兜汁可以大兜啲就好喇!食咗幾日開始覺得好唔環保,所以而家落order時已經備註無須餐具,同埋食完之後會洗番個膠盒留待日後再用。最開心係大啖大啖咁食都唔怕超標,因為已經有專人幫我計好晒,食得安心又放心!

見到自己食完兩星期,減咗5磅,覺得好神奇呀!明明每日都大啖大啖咁食,食到好飽。不過未必係直接因為AMGD嘅!我另外仲有戒甜、戒零食同做運動。畀大家參考下:

早餐:麥皮
午餐:AMGD
晚餐:家常便飯 (多菜少肉+兩碗湯)
運動:多行樓梯及每天抽小小時間跳萬寧貓貓三次
注意:戒甜、戒零食

但無可否認嘅係AMGD真係一個好好嘅推動力,亦令我邁向更健康嘅生活。嚟梗都想試下羊,唔知嚟到會唔會有騷味呢?不妨一試!哈哈!AMGD健康有營,值得推介!

有興趣嘅朋友一定唔可以錯過佢哋最近做梗嘅10,000 Likes優惠!除咗免運費之外,買指定Pass仲會送多最多5個魚類bento。詳情可按以下連結:
https://www.facebook.com/amgdhk/posts/795545577295160

預祝各位都能夠「Have an Ahhmahhgawd Moment」!


AMGD
電話:2389 6088
網址:http://www.amgd.hk
facebook:https://www.facebook.com/amgdhk


FIND US on:
     

BLOGs:

CONTACT US: