2017年11月1日 星期三

【矯正坐姿】可調較高低兒童座椅

好多媽媽都會為小朋友添置兒童枱櫈,方便佢哋做功課、溫習,但我哋礙於地方淺窄,張飯枱就變成為萬能喇!食飯、茶點、做功課、溫習都係響飯枱進行,諗諗下張枱都好抵用喎!不過問題開始浮現,就係覺得朗朗同啲課本貼到好埋,近乎係聞住啲書嚟溫習,唔知係咪因為咁就搞到近視喇!我哋試過加添厚坐墊,嘗試令佢哋坐得高啲,但似乎效果唔係咁理想。見到朗朗繼續「聞書」,好擔心佢近視會越嚟越深,所以決心解決!最後響淘寶搵到可調較高低嘅兒童座椅,唔錯喎!一定要介紹埋畀大家呀!

登...登....就係呢款喇!係咪好靚呢?收到貨比預期中理想,好滿意呀!

而家晴朗真真正正坐高咗,較番啱適當嘅高度響枱度做嘢,身為家長都放心晒喇!
等我同大家唔同角度睇下呢張櫈啦!

側面~

側後面~

後面~

可調較嘅呢張櫈比起原先嘅大人櫈坐得高好多呀!證明之前坐嘅高度係幾咁矮呢?如果早啲買就好喇!

最鍾意係有兩個腳踏位,坐到咁高對腳都唔駛「吊吊fing」,設計得幾好~

前面~

腳踏可以調節高低,仲可以360度旋轉添!小朋友坐得耐都唔怕攰,坐到咁高都可以腳踏實地,唔錯呀!

前後比較~

店主仲送咗兩張坐墊,好貼心呢!

坐墊都有少少厚度,加咗坐墊軟啲,又有啲毛毛咁,係會坐得舒服啲~

唔好以為送嘅嘢就會質量麻麻,晴朗都好鍾意呀!加咗坐墊的確係可愛好多~
貨到後太心急砌,原來藍色果張兩隻櫈腳砌錯咗!不過唔駛幾分鐘就裝番好,搞掂!

靚晒!啲癃癃向番晒入面先靚仔加嘛!

櫈腳有4粒圓形平衡防滑腳墊,平穩防滑,唔會咁容易翻側~

雙層加厚嘅椅背,特別覺得結實、安全又穩陣呀!
原本仲係有啲心郁郁想淘晒成set兒童枱櫈番嚟㗎!但不得不向現實低頭,兩set真係冇位放,而且用到去某個年齡又唔啱用,變咗好浪費。呢款可調較嘅兒童座椅由3歲96cm坐到去20歲165cm都冇問題,可根據唔同嘅年齡自由調較高度。而且配搭訂製書枱、成人書枱、飯枱等70cm以上嘅固定台面都得!之前用飯枱做功課太高,茶机又太矮,而家搵到合適嘅座椅嬌正咗坐姿,真係唔駛再為「聞書」而煩惱喇!最重要係張櫈夠結實又穩固,可以承受最多180lb重量。我坐過落去都覺得足料,唔易變形或翻側,咁畀小朋友用都安心啲啦!貨到嘅時候,唔駛半個鐘砌好晒兩張,工具都跟齊晒!方便又易安裝呀!晴朗在旁睇住我砌,仲話覺得好似新屋入伙咁添!我睇過幾間嘅評語,有啲店嘅買家覺得膠料冇想像中咁厚實,所以唔好貪平,想買好嘢一定要做足功課唔懶得!櫈要啱坐先會更舒適,伴隨住小朋友成長學習就更開心啦!
睇到呢度,你一定會問我響邊間淘寶店度訂。OK!我會畀埋大家!但有關貨品問題或淘寶導致嘅損失,我哋唔會負責喔~
淘寶店網址:https://item.taobao.com/item.htm?spm=a1z09.2.0.0.530111516sg4ol&id=527325272143
費用參考:
可調較兒童座椅 x 2張 - HK$594

使用BUYUP集運送至住宅 - HK$138
TOTAL: HK$732

※ 我們只作產品推介及說明講解,閣下須自行承擔淘寶可能導致的一切風險及損失。


FIND US on:
  "  "   
BLOGs:

 
CONTACT US: