晴晴一見到「歷奇探索室」啲相片已經話想去玩喇！既然咁吸引，即管去踩下場囉！
適逢朋友仔生日，今次除咗晴朗，仲多咗個玩伴添！
一齊向「歷奇探索室」出發！欲知各人膽量如何，請繼續觀看下文。
早咗去到位於荔枝角嘅「歷奇探索室」，等梗上一班完結嘅時間，小朋友探頭偷看已經好期待同興奮！朋友仔雖然口講「好驚！唔敢玩」，但開門後第一個入去嘅竟然係佢喎！XD
個個去齊晒洗手間，就過嚟穿上裝備，為一陣間嘅歷奇之旅做好準備喇！
著好晒裝備嘅小朋友份外醒目！
熱身運動唔少得！一齊跟教練做啦！1234~ 2234~~
挑戰一：盪盪橋
玩法係先要踏過每條以水管同繩索製成嘅韆鞦，過程都幾搖，幾考膽量~
到達終點後，需要拋三個波，入晒樽之後就可以回程~
調頭唔係咁容易，同樣需要膽量同跟教練指示，淨係郁手定郁腳先同埋放邊個位置已經好大學問喇！
終於成功調頭企啱方向，好開心！
跟住由朗朗元範一步一步慢慢行番去起點~
返回起點時果仲成功感係難以形容㗎！
挑戰二：繩網
相信大家都玩過繩網，其實冇特定規則，但就有一啲技巧。首先個人要側身好似蟹仔咁向上行~
去到中段就可以轉身向正前方，往上爬~
爬到去最頂，大家敲鐘個樣都好興奮呀！跟住就慢慢原路返回起點，自信心又提升咗喇！
挑戰三：獨木橋
玩法係先行過一條以繩索同水管組成嘅獨木橋，期間要保持平衡先得㗎！
然後就要運用一個車軚運送自己過去另一條獨木橋~
行到去終點嘅時候就可以調頭~
踏過兩個車軚後就可以去番第一條獨木橋~
沿住獨木橋返回起點就完成！
晴晴每當腳踏實地嘅時候就「牙擦擦」，但一上到去接受挑戰嘅時候就好自然不停講「唔得！」，希望透過今次活動可以提升佢嘅自信心啦！
挑戰四：獨木橋 (升級版)
成功挑戰完獨木橋，梗係要將難度升級啦！今次行完車軚後就要折返，如果膽量細啲真係會畀幾個車軚搞到拗晒底㗎！
企響車軚上面調頭唔係咁容易，往往會企咗響度唔知點做好~
唔駛緊張！只要跟住教練指示一步一步慢慢做就得㗎喇！
過晒車軚之後，行埋獨木橋返回起點就搞掂！
一樣係難唔到我哋呀！任務完成好滿足！Yeah!!!
挑戰五：繩梯
繩梯玩法好簡單，就好似爬上去上格床咁之嘛！XD
不過爬嘅時候會好搖，因為條梯只係用繩索同木條組成。爬到去最高嘅時候，教練會要求小朋友摸下掛咗響天花板嘅葡萄~
再搵下見唔見第二串葡萄呀？
搵下摸下就摸到滿足感番嚟喇！
朗朗平時爬得多上去上格床所以難佢唔到，晴晴似乎有啲驚驚喎！
唔怕！在教練鼓勵之下，最終都一樣做得到！從佢嘅笑容就知幾有滿足感啦！
挑戰六：平衡木
平時玩開嘅平衡木只係離地少少，但今次嘅唔同，離開地面都有一段距離，而且用繩索束起嘅木板，更顯搖晃~
首先在平衡木嘅一端開始行~
期間只可以靠雙手捉緊繩索來行，真係好考平衡力呀！
當到達另一端嘅時候，就要調頭行至木板中央位置~
嘗試「大」字形咁企響木板上，定格幾秒鐘。除咗平衡力要夠之外，膽量都好重要呀！
做完「大」字形再行番去起點~
睇落簡單嘅動作，其實做落係唔簡單㗎！能夠完成都好值得讚喇！
晴晴玩平衡木嘅時候特別需要鼓勵，我同教練都不斷氹佢，一定做到㗎！加油！
經歷過一輪內心害怕、緊張、嘗試、掌握之後，晴晴都能夠完成！信心又番晒嚟啦！
挑戰七：攀石
攀石都幾多地方可以玩得到，相信好多人都玩過。但點先可以摸同踏啱位置，最快上到去最高，咁就好考技巧喇！
唔駛擔心！教練一定會從旁指導，家長可以安心又放心~
上到去最高嘅時候，教練會要求小朋友掂一掂天花板嘅葡萄，咁就完成第一個任務喇！
第二個任務係要響攀石區打橫行，一樣掂呀！
最後，慢慢爬番落地面就完成！
晴晴同朋友仔等待中，幾咁輕鬆自在？^^
挑戰八：空中慢步
「空中慢步」係由繩索束起3個車軚所組成，上咗第一個車軚後，就要向前踏過去第二個車軚果度~
想企定響一個車軚上都唔係咁易，要踏啱位置，令車軚同整個人平衡~
跟住就要向第三個車軚進發喇！
成功行到去第三個車軚為之完成！
過程都好考平衡力同身體協調，唔好睇只得三個車軚，做完之後都真係幾攰㗎！
挑戰九：型飛索
嚟到小朋友最期待嘅飛索時間！扣好安全裝備先~
然後就由起點出發，飛呀！~~~
唔淨止飛咁簡單，小朋友係會有任務在身㗎！當飛到過對面嘅時候，要手快快從教練手上攞走一個細小嘅手握公仔~
然後飛番去起點，再次飛過去對面放低個公仔~
試完公仔，就試下糖果啦！吸引力仲大喎！
放低埋支糖果就完成！
又到鬆一鬆嘅時候喇！今次瞓埋響度實行睇朗朗表演~
朗朗一句話安全帶束得唔舒服，兩位教練就馬上同佢加啲墊響身上面，好細心！到朗朗飛喇！~~
個個小朋友玩飛索都係同一個笑容，好開心呀！
今次搵嚟朋友仔嘅嫲嫲幫手接公仔，哎吔！接唔到添！朗朗乘機可以飛多次，勁hyper！
最後各人再玩多次飛索，今次以「大」字形咁飛過去，玩咗咁耐膽量都大咗好多喇！
晴晴進步咗好多，能夠睇住小朋友進步，做家長嘅梗開心啦！
兩小時嘅歷奇之旅圓滿結束，快樂嘅時間過得特別快，又係時候講拜拜~
牆上嘅告示板貼滿嚟玩過嘅小朋友開心相片，原來可以響呢度開party㗎！睇見啲相都感受到當中歡樂嘅氣氛呀！
我哋玩咗咁耐都未玩晒所有歷奇，聽講有啲新嘅都未貼出嚟！下次一定要試埋佢先得！
三個小朋友體驗過唔同歷奇挑戰後，自信心大增，膽量都大大提升呀！嘩！哈哈~
「歷奇探索室」由葡萄園工作室創辦，而葡萄園工作室係一間天主教嘅非牟利社企，透過唔同嘅歷奇活動及培訓，提升青年人自我概念，自我肯定，發揮所長，又透過參與社會各方面嘅事務，回饋社會。既然係社企，就更加要多多支持啦！
室內玩歷奇都唔錯喎！
呢度一個人都玩得，出面果啲多數有規定最少人數。
而且好天、落雨都冇問題，對於晴朗媽媽嚟講，好處係連防曬都唔駛搽咁多呀！
去玩歷奇之前，朋友仔嘅媽媽仲擔心佢去到會唔敢玩，因為平時去公園爬高啲都驚。
我事前已經叮囑晴朗一定要多啲鼓勵朋友仔，等佢可以大膽啲一齊玩。
但結果竟然係朋友仔玩得最放、最大膽，而晴朗響地面就「牙擦擦」，一上到去玩就笠晒水。
「唔得！」變成咗晴朗嘅口頭禪，但每當做到又會響度偷笑喎！
不過晴朗由開頭唔敢試，到主動嘗試，都進步咗好多。
冇因為內心嘅害怕而唔再玩已經好好喇！「歷奇探索室」嘅唔同挑戰，可以增強小朋友嘅自信心，睇住佢哋進步好開心呀！
真係一個唔錯嘅培訓好地方！
玩之餘又可以激發鬥志同毅力，以後落雨都可以玩歷奇啦！
有興趣嘅朋友要留意！
小朋友響冬天都可能會著得比較厚，但由於都幾需要體力勞動，小朋友會玩到成身汗㗎！
去玩嘅話就可以裡面著得薄啲，出面一件厚褸就ok喇！
預祝您哋嘅小朋友都會擁有一個愉快嘅歷奇之旅啦！
精華片段：
歷奇探索室
地址：九龍荔枝角青山道489-491号香港工業中心A座9樓A2室
電話：3956 2108
WhatsApp：5509 8089
網址：https://www.fhl-aec.org
facebook：https://www.facebook.com/pg/vineyardstudio
FIND US on:
BLOGs:
CONTACT US:
沒有留言:
張貼留言