聽講新店除咗波波池、玩具等設施外，仲有唔同嘅馬仔騎喎！
而且可以參加佢哋嘅親子曲奇製作班，一齊整一齊食，共渡難忘嘅親子時光。
有得食又有得玩，點可以唔去踩下場呀？
跟貼啲！跟住嚟啦！
PLAY HOUSE嘅Play Café位於荃灣D．Park愉景新城~
話明係Café，當然有廚房為客人炮製豐富美食啦！門外設有雅座，就算唔打算入去玩都可以品嚐Play Café嘅味道呀！
晴朗已經急不及待入場喇！戴好手帶就入去囉！衝呀~~~
入到去，左邊鞋櫃，右邊locker。locker租金$10，按金$50，離場時會退回按金。見到鞋櫃好自然就想除鞋，但職員即時提我哋入波波池區先要除，餐廳呢邊著鞋冇問題，所以我哋又急急腳穿番對鞋喇！XD
先入party房放低嘢！但晴朗冇跟到入嚟！好明顯係因為波波池太吸引啦！
波波池入口在此！我都唔執輸，入去感受一下先~ XD
晴朗去玩就梗係快手快腳啦！平時做功課同溫習都有咁快就好囉！@@'''
雖然波波池啲波同Mikiki分店一樣係藍+白色，但今次唔係海洋主題，見到晴晴騎住隻長頸鹿都應該大概估到喇卦？仲未知？係非洲森林呀！^o^
嘩！火山爆發！快啲逃離現場！~~
Run~~~ 晴朗都馬上「危險速逃」，入到攀爬架內就好似走入迷宮一樣，有唔同嘅障礙需要衝破。究竟晴朗能唔能夠逃出生天呢？
考驗嚟喇！要通過此路，必須要有一定膽量。因為下面係透明㗎！@.@
但似乎驚都唔驚下喎！仲開心到跳起添！XD
接住落嚟係大大小小嘅障礙關卡，晴朗都能夠一一挑戰成功！
最後瀡過三色滑梯返回起點，發現火山已經熄滅，大人同小朋友都安全喇！Wow~ hoo~~
話時話，到底滑梯有幾多種玩法？等晴朗啲朋友仔話畀大家知~ XD
「捐癃捐隙我至叻！」，要追住佢哋影相真係索晒氣~ (汗''')
波波池側邊有個彈床區，除咗有地方畀小朋友走動外，仲有個無敵彈彈彈彈床~ *o*
睇下晴朗嘅朋友彈得幾咁高就知個彈床有幾彈啦！XDD
非洲森林又點少得斑馬、馬仔同獅子呀？快啲去馴服佢哋囉！~
晴晴一騎就騎最惡果隻，但又出奇地騎得幾好喎！^o^
朋友仔們都變晒馴獸師，全部動物都乖乖聽晒佢哋話，有朋友仲歡喜到想抱隻馬仔番屋企添！XD
晴晴繼續同朋友仔hyper咁你追我逐，完全係忽略咗媽媽，我突然覺得好寂莫... ~o~
「HELLO!」終於醒起要搵下媽媽喇！呢度設計到好似由屋內望出窗口咁呀！
朗朗仍然係沈醉於波波池，其實無分年齡，波波池真係好大吸引力~
夠鐘喇！夠鐘喇！係時候集齊人馬去party room整曲奇餅~
Calling! Calling! 請到Party房集合！
小朋友們搖身一變化身成為小廚師，好醒目喔~ *o*
呢位Tim叔叔將會教我哋整曲奇~
做法好簡單！小朋友只要將預先拌好咗嘅粉糰碌下、搓下，按平佢然後吸模就搞掂！好easy~
晴晴已經將粉糰按壓好，跟住就去揀自己喜歡嘅模具啦！
一個接住一個，用模吸出唔同形狀~
晴晴整咗薑餅人、兔仔同小天使~
而朗朗就鍾意全部整晒薑餅人喇！
攞去廚房焗15分鐘就食得！等待嘅時候，小朋友當然唔會坐定定啦！
衝呀！追呀！繼續去玩囉！~
同朋友仔追追逐逐，個個都玩到出晒汗喇！
響呢個時候，不如介紹一下餐廳區啦！
嘩！啫喱糖、蛋糕、cupcake、macaroon...全部都好吸引！而且仲有薯片、餅乾發售添！
全場4500呎，波波池差唔多佔咗一半位置，座位唔算好多，所以佢哋場場都好full㗎！週末或紅假Walk-in未必有位，最好就打去book定啦！
umm... 香噴噴！我哋啲曲奇出爐喇！
「我果個係薑餅人，你果個係咩嚟呀？我哋交換試下囉！」，你一句我一句，分享食物至開心！^o^
據聞呢度啲嘢食整得唔錯！同Mikiki果邊有得fight！咁就要試試喇！
兒童套餐A：火腿、粟米、菠蘿pizza + 有機蘋果汁
兒童套餐C：粟米肉醬螺絲粉 + 田園鮮水果 + 法式蛋糕仔 + 有機蘋果汁
焗蜜糖雞中翼
棉花糖泡泡朱古力
鮮什果茶
玩到攰自然胃口都大啲！相機食完就到晴朗開餐囉喂！~
一向都覺得有餐廳嘅playhouse重點不在於食，所以唔會對食物抱有期望。但pizza個底好脆，饀料好足又重芝士味，雞翼味道除咗蜜糖，好似仲有啲柚子味，杯朱古力整埋哈哈笑樣十分討晴晴歡心，整體嚟講食物都好有水準喎！*o*
杯什果茶啖啖果肉，唔只食物好ok，連嘢飲都好得呀！
各處鄉村各處例，響餐廳內當然唔食得外來嘢！拎出嚟食都唔好意思啦！U_u
餐廳設有換片區，睇住人哋換片又令我諗番起晴朗細個。咁耐冇換過片，而家再叫我換片可能會雞手鴨腳喇！XD
唔同size嘅尿片、濕紙巾、BB圍巾、搓手液一應俱全~
餐具可以自助攞！記得幾時都要勤洗手呀！
無限量提供飲用水同紙巾，不過切記要為環保出一分力，珍惜資源，勿浪費~
差啲唔記得介紹仲有多款玩具玩，不過波波池嘅吸引力已經遠遠超出於玩具喇！^^'''
玩下、整下、食下，已經差唔多到清潔時段，亦即係我哋嘅party快將完結~
最後，晴朗同班朋友仔繼續勁loop滑梯，瀡到我哋叫停先捨得走。快樂嘅時間過得特別快，又係時間講拜拜！^^
D ‧ Park呢間PLAY HOUSE Play Café特別在有多款馬仔騎同埋可以同小朋友一齊整曲奇。
啲曲奇出奇地香脆可口，新鮮出爐確係唔同啲！
小朋友好有滿足感，連我都一塊接住一塊食呀！晴朗同埋一大班朋友仔都玩得盡情又開心！
Play Café真係一個唔錯嘅親子好地方！
佢哋新張期內做梗特別優惠！
由而家至到2018年2月28號，逢星期一至四(公眾假期除外)可以無分時段任玩。相同價錢但可以玩耐啲喎！
大家都趁早啲入去玩下啦！
平日人少啲walk-in都ok㗎！
包保大人同小朋友都玩到唔捨得走呀！
以下係餐牌、入場費、月費同埋Party費用資料，醒埋畀大家喇！(可按圖放大)
你或者會想睇埋Mikiki分店嘅資料~【海洋世界】PLAYHOUSE親子咖啡廳@新蒲崗Mikiki :
http://blog.xuite.net/chinglongtin/blog/501612542
PLAY HOUSE Play Café @ D‧Park
地址：新界荃灣青山公路荃灣段398號愉景新城商場2樓2069b及2070a號舖
電話：2778 5999
網址：http://www.playhouse.com.hk
facebook：https://www.facebook.com/playcafedpark
FIND US on:
BLOGs:
CONTACT US:
沒有留言:
張貼留言