2016年6月28日 星期二

魔幻間@澳門新濠影滙

「魔幻間」係新濠影滙其中一項主打嘅娛樂節目,我哋即將會進入奇幻嘅魔術之旅,are you READY???
去到門口,可以先欣賞一下精彩片段~


入口設計成一個大型魔術道具,我哋將會穿越呢個道具箱進入魔法劇院


入到箱內,四周佈滿鏡,好似入咗迷宮咁呀!感覺好虛幻~


四處燈光昏暗,營造咗一股疑幻疑真嘅氣氛,已經好期待一陣間嘅表演喇!

在魔術師出場之前,可以周圍參觀,欣賞一下牆上嘅精心佈置~


呢個大型魔術道具,似曾相識,唔知響邊套電影裏面見過呢?


魔術師突然在人群中出現,為觀眾表演小魔術,先同觀眾warm up一下~


世界知名嘅魔術大師出場喇!


佢教梗我哋一啲魔術小技倆,呢個魔術係點樣將一條紅絲巾...


變成一隻蛋,又提我哋一啲竅門,點樣先唔會比人識穿,講解得好生動有趣~


又邀請現場觀眾坐入去大型魔術道具內,然後將道具高速轉動,當道具停下來嘅時候,道具內空無一人。原來變走咗個人呀!究竟會去咗邊呢?諗極都諗唔明~ @@'''


warm up完之後,我哋就步行至其中一間魔法劇院喇!


第一場表演係一啲小型魔術,一男一女魔術師互相輪流表演,包括咗紙牌、畫圖畫、繩索嘅魔術。個鬼佬表演得既生動又帶點幽默,成日用國語問觀眾:「好不好」。最好笑嘅一幕係鬼佬揸住一幅女魔術師嘅畫像,將畫像摺埋之後,攞咗條紅色裙出嚟,問觀眾想唔想睇下幅畫變成點,女魔術師梗係話:「唔好」啦!晴晴都有份大聲答鬼佬:「好」!全程不斷響起熱烈嘅掌聲,好搞笑精彩嘅一場表演~


睇完一場,就轉換到去另一間劇院。場內設計好似入黑後嘅公園咁,陰暗嘅樹影,帶比觀眾一種神秘莫測嘅感覺。另外兩位魔術師出場,男魔術師大玩小朋友最愛嘅bubble,表演出神入化,永冇失手,簡直係精彩絕倫,令觀眾嘆為觀止。而女魔術師玩弄魔術棒嘅奇技,都令我哋留下深刻印像。又一場精彩嘅表演,掌聲不絕~


經過兩輪緊湊嘅熱身之後,又轉換到另一間更大嘅魔法劇院,準備接受更加攝人嘅魔幻考驗~


最後呢場有好多大型嘅魔術表演睇。好勁!簡直令觀眾讚嘆不已~


大型嘅魔術道具響電視就睇得多,但親身體驗都係第一次,原來現場感受係咁正㗎!每一個表演都好神奇,令我哋好懷疑雙眼所睇到嘅嘢呀!


呢場唔只係魔術表演咁簡單,仲包括咗音樂、舞蹈、燈光......等舞台效果。而家做魔術師真係唔簡單,要多才多藝至追得上潮流~


各個表演人員都互相配合得天衣無縫,真係一場GOOD SHOW!!!


魔術表演在超讚嘅舞台效果配合之下,真係好AMAZING!!!


表演完畢後,台下觀眾心情都十分之高漲,仲排住隊要同魔術師影相添!


離開劇院會通過一間魔術用品店,小朋友有興趣嘅可以買啲入門級道具番屋企玩下,話唔定第時都可以成為一位出色嘅魔術師呀!

「魔幻間」3間獨立魔法劇院帶比我哋三種唔同風格嘅魔幻旅程,每一幕都好難忘!一浪接一浪連環觸動我哋嘅感官神經,將魔幻旅程推到最高點,睇到好high呀!拍爛手掌!期間會有啲互動,觀眾不停喝采,大家都全情投入表演當中。呢90分鐘嘅表演,簡直係一次超凡體驗嘅魔術旅程!雖然千幾蚊係有啲肉赤,但真係值回票價。Good Show!!! 好好睇呀!

一齊嚟睇下佢哋嘅預告片啦!

我哋事前做足功課,4張飛係響淘寶買嘅,抵好多呀!各位精明眼可參考以下資料:
悠遊假期https://travelitem.taobao.com/item.htm?id=526969873940

 

 魔 幻 間 
位置:澳門路氹連貫公路新濠影匯2樓
網址:http://www.studiocity-macau.com/tc/entertainment/detail/the-house-of-magic/魔幻間
表演時間:星期一至五 15:00, 19:00, 21:00;星期六、日 15:00, 17:00, 19:00, 21:00
夏季表演時間(1/6/2016~31/8/2016):星期一至五 16:00, 18:00, 20:30;星期六、日 14:00, 16:00, 18:00, 20:30
票價:成人$450 / 小童$360 / 澳門居民、長者$380

返回澳門新濠影滙之旅http://blog.xuite.net/chinglongtin/blog/426733195