2016年6月8日 星期三

沙頭角農莊

沙頭角這地方,總會給人一種神秘的感覺。今次難得透過學校親子旅行闖進去,目的地係沙頭角農莊,一齊嚟揭開佢哋神秘嘅面紗囉!
事不延遲,到達農莊後,田園導賞便隨即開始

呢位就係我哋嘅導賞員叔叔喇!正為我哋介紹梗手上嘅芝麻葉,呢種葉可以用嚟製作茶粿㗎!

感受下塊葉嘅質感先,厚厚地,葉面上有層毛毛,摸上去好得意呀!

呢啲草係香茅嚟㗎!聽聞有驅蚊功效

點解山卡啦嘅田園會嚟咗部火車嘅?原來農莊以前係火車尾站嚟!路線由上水開去沙頭角禁區,票價每人兩毫子,不過已經響1928年任務完成,功成身退lu~ 但依然可以見到部份火車軌,農莊嘅人特別在路軌上自己買組件砌番一部火車出來供小朋友參觀

醉翁之意不在錦鯉池,見唔見到有隻紫紅色嘅蜻蜓?好特別呀!以前從未見過~

紫色果啲係蕃薯葉,蕃薯當然就喱埋咗響泥土下面啦!

好多種稙得好靚嘅小盆裁

相信一定要好用心打理先可以keep到咁靚喇!

呢啲又係咩嘢植物呀?

見唔見到有個瓜吊咗響度呢?係大家都熟悉嘅矮瓜呀!

仲有豆角添!

天花上面嘅果實係熱情果嚟!

呢度地方夠晒大,導賞員叔叔繼續帶我哋前往溫室區喇!

溫室種植,響電視就睇得多喇!但親身行入去都係第一次,感覺好得意呀!

周圍種咗好多蕃茄,咁細個應該叫做車厘茄先啱喇!

好新鮮呀!唔知可唔可以咬啖試下呢?XD

開心大發現,真係有大番茄呀!

用嚟做沙律一定好鮮甜啫!

無花果,原來無花果呢種植物係會有花生出嚟㗎!咁應該改名叫做有花果喎!XD

紅色果啲叫做一串紅

呢啲叫做羽衣甘藍,食得㗎!有預防女性普遍常見嘅cancer功效,不過如果有長期病患食梗駁血丸或者患有腎病就唔食得喇!四大家族之中除咗佢,仲有介蘭、椰菜花、西蘭花

繼續向另一個溫室種植場進發~~~

呢個場仲大呀!

種咗好多各種各樣嘅植物

其中以呢顆最吸引我哋注意

種梗嘅係日本蜜瓜嚟呀!一陣仲會有得試食添!

行完溫室場,見到有兩個小檔攤,有咩正嘢先?

原來有秋葵、日本蜜瓜同車厘茄試食,隔離仲有叁和茶試飲添呀!

朗朗二話不說已經不停食不停食不停食~~~

啲蔬果真係好新鮮,$50/3款,我哋買咗一盒車厘咖同埋兩包叁和茶

叁和茶味道甘中帶甜,我至鍾意就係呢種味道嘅茶喇!成份包括溪黃草、羅漢果花同埋雞骨草,開熱水沖泡5-10分鐘就飲得,好方便!而且仲有清熱解毒、祛濕、清肝火、解口乾舌燥等功效添!

Hello!兩隻招彩貓貓~

睇完植物,就到小朋友最期待嘅動物喇!

一齊向動物區進發~~~

孔雀好靚呀!但係我哋不停咁讚佢都唔肯開屏....

啡兔仔

白兔仔

龜仔

山羊一見到我哋就好興奮喇!

梗係啦!有得開大餐喎!

睇下啲山羊食飽飽個滿足樣~

嘩!咩嘢嚟呀?條頸咁長嘅??

原來係駝島,我哋都係第一次見真正嘅鴕鳥咋!原來實物係咁巨型 @.@

過嚟食嘢囉喂!~~~

仲有見到人不停「鵝鵝聲」叫嘅肥鵝,突然諗起深井燒鵝添~ XD

小橋流水,聽住啲流水聲,好舒服,來到鄉郊地方,親親大自然感覺真係好好呀!

停一停!又有新發現!

督賞員叔叔介紹響啲葉上白色一pat pat果啲係青蛙卵嚟!

唔只見到一pat,附近都有呀!原來樹上產卵嘅蛙類,會將卵粒黏響樹枝或葉上,但唔係隨便搵顆樹就得,一定要搵一個樹下有水嘅地方,咁先方便孵出嚟嘅蝌蚪可以直接掉落水中

行下行下,又有新發現,見到嗎?

葉上有隻小甲蟲呀!

經過荷花池,回到有蓋場地又開始另一個活動喇!

工作人員為我哋預備梗整茶粿嘅材料

芝蔴葉攪碎加片糖加水就係黑色果一盤,工作人員正將葉汁加落去啲糯米粉度~

搓好咗一個粉糰比我哋,可以整茶粿喇!

努力將粉糰搓成小圓粒

按壓扁些少,完成!可以攞去蒸喇!

跟住有咩做好呢?開始有啲餓,不如開餐囉喂!~~~

嘩!響至肚餓嘅時候見到咁多豐富美食,真係不得了!

一定要不停拆不停拆不停拆先得呀!

我地唔客氣喇!

小食部都好多嘢賣喎!

咸檸檬、脆黃薯、脆蘿蔔...

有機蔬菜、黃心蕃薯....

咸金桔、有機咸醬瓜、洛神花

仲有小朋友鍾意嘅玩具呀!@.@ 呢個唔駛介紹,因為晴朗一早已經帶我埋去介紹咗幾次,結果梗係有收穫啦!買咗車仔...

同埋戒指,做小朋友真係開心喇!

下午設有自由活動、參觀紅樹林同埋餵飼錦鯉魚

但係佢哋玩bubble已經飽晒喇!

完全忽略咗媽媽想去參觀紅樹林同餵錦鯉嘅心情...不過唔緊要!見佢哋玩得開心就得啦!

茶粿出爐喇!又整得幾似樣喎!

唔講唔知!如果參觀人數達200人或以上,農莊仲會有師傅即場炮製朱古力發售,聽聞好好味㗎!

另外,亦會有新鮮出爐老婆餅同皮蛋酥食添!好想試下呀!

呀!~~~ 我哋會再來呀!
沙頭角農莊地方大、導賞多嘢睇、午餐食物豐富、茶粿製作又好玩、員工仲好親切添!好想再嚟玩過呀!不過佢哋暫時唔接受個別人仕申請,如果想去玩嘅,可以自己組團參與,人數夠24人便成團喇!下次嚟一定要試埋精心炮製嘅朱古力同新鮮出爐嘅老婆餅、皮蛋酥先得呀!

 沙 頭 角 農 莊 
地址:香港新界沙頭角塘肚村30G
電話:2655 9661, 2655 9141
網址:http://stkfarm.com