2017年7月26日 星期三

【經濟好玩】澳門燒灰爐兒童公園

邊個話揸車係男孩子嘅專利嚟㗎?其實女孩子都可以玩得好型、好有速度感!過澳門想去公園,又想玩電動車,一定要介給呢個全澳門獨有嘅露天兒童電動車場畀大家。係一個放電兼過賽車癮嘅好地方嚟呀!
澳門燒灰爐兒童公園遠離繁華鬧巿,感覺就特別悠閒自在喇!


嘩!好多部電動車等梗我哋呀!一於去大玩特玩囉!~

晴朗雙眼已經發晒光喇!*o*


仲唔即時跳上車?預備體驗駕駛嘅樂趣啦!gogogo~


電動車場唔係好大,但麻雀雖小,五臟俱全。有紅綠燈、斑馬線、行車線同路牌等等,真係十足十響馬路上揸車咁㗎!

玩嘅範圍睇得到晒!咁就可以更安心同方便照顧啦!


賽事一觸即發,朗朗一坐上車就駕輕就熟,一馬當先喎!XD


女孩子都唔輸蝕㗎!揸白色勞斯萊斯嘅晴晴從後追住上,戰況激烈,究竟最後誰勝誰負呢?


要相信自己,憑住永不放棄嘅精神同毅力,一定可以獲得滿意嘅成績㗎!


朗朗一直領先在前,仲拋離晒啲車,好有信心咁喎!不過成績好都唔可以輕敵,乜你冇聽過「龜兔賽跑」嘅故事咩?


晴晴繼續踩衡油向前衝,衝呀!逢車過車,越戰越勇!


終於去到同朗朗只差一個車位嘅位置,好快就可以超越佢喇!


點知響呢個時候...突然大塞車。好彩一眾車手都臨危不亂,仲好有秩序咁衝出重重障礙添!


好快又可以繼續緊張刺激嘅比賽喇!


攀上第一位嘅感覺太捧了吧!晴晴情緒好高漲呀!


其他車手都技術精湛,好快又追番上嚟喇喎!


最終帶頭衝線嘅係朗朗,睇佢成副戰鬧格就知幾有鬥心啦!


晴晴都跟住衝線喇!其實勝負並不重要,最緊要玩得開心!Yeah!!!

特別報告!特別報告!

開心大發現呀!over~


電動車場隔離原來仲有個兒童遊樂場,玩飽車車可以過嚟呢邊放電,一舉兩得!

做父母嘅可以繼續抖下喇!XD


遊樂場內設施應有盡有,包括有攀爬架...


轉盤遊戲....


滑梯...


仲有攀石設施添!


小朋友東跑跑、西跑跑,玩到唔願走呀!

燒灰爐公園?我成日記錯個名係燒碳公園。我啋!不過其實呢度一個灰爐都冇,係咪應該加番啲爐等人可以BBQ呢?OK!言歸正傳!我覺得呢個露天車場設計得幾逼真,小朋友玩得好投入,幾好玩呀!晴朗玩完又玩,一連玩咗3轉。MOP$5/15分鐘,總共玩咗45分鐘。真不愧為爛玩一族呀!

公園原意係想讓6歲以下嘅小朋友透過模擬真實道路上駕駛,可以學習道路安全知識。但似乎小朋友都比較喜歡自由發揮,我都明嘅!亂衝亂撞咁揸車先好玩加嘛!啲車都撞到七勞八損囉!不過小朋友一於少理,有得玩就開心啦!呢度啲職員都好有禮貌同愛心,晴朗去購票時,職員考佢哋數學,問應該要找幾多錢,好搞笑呀!傾開計先知,原來公園高峰期試過有成60位小朋友輪候玩車,好誇張!今日可能落過雨,得10個8個算係少喇!我哋都算好彩喎!

公園附近仲有一啲親子好地方,好似澳門科學館咁,小朋友又可以玩上大半天喇!有興趣嘅朋友,可移玉步睇埋科學館篇blog啦!

澳門科學館:http://blog.xuite.net/chinglongtin/blog/449740207

燒灰爐兒童公園既有兒童遊樂場,又有深受小朋友愛戴嘅電動車玩。唔只可以放電,仲可以一嘗駕駛樂。大家過澳門都可以考慮下去呢度!又平又好玩,絕對值得推介!不過要小心小朋友玩到唔捨得走呀!

精華片段:


燒灰爐兒童公園
地址:澳門半島公園街12號

開放時間:星期一至日 06:00~20:00
費用:全免
交通:巴士路線6、16、18、23、28B (燒灰爐站落車)

電動車租借
時間:星期一至日 09:00~18:00
費用:MOP$5/15分鐘


FIND US on:
     

BLOGs:

CONTACT US: