2017年7月19日 星期三

【茶控必試】京林屋 Kyo Hayashiya

晴朗家原本就只得一個抹茶控,但唔知係咪受我影響,連晴朗都正式加入抹茶控行列喇!最近,我哋就去咗一間茶系甜品店,食到好滿足呀!想知多啲?跟住嚟啦! 
「京林屋」響日本已經有二百幾年歷史㗎喇!亦係經典抹茶甜品及焙茶始創者。而位於銅鑼灣呢間就係佢哋嘅海外分店喇!


門外等候嘅人數眾多,晴朗趁呢個時候睇下邊款甜品啱心水。淨係睇display已經流晒口水喇!


捧場客十分多,等咗半小時終於有位。坐低櫈都未暖,我哋已經急不及待揀甜品喇!

店員溫馨提示每人最少要order一款食物或飲品,限時1個鐘。一於叫4款甜品啦!晴朗食唔晒嘅我嚟包底!XD


首先上枱嘅係抹茶同培茶嘅啫喱雪糕,見到晴朗嘅笑容就知佢哋係幾咁期待啦!盡情去嘆喇喂~~


抹茶啫喱雪糕 - 雪糕嘅抹茶味香濃,而且口感幼滑到不得了,味道又唔會太甜,啱啱好。而啫喱軟硬適中,茶味十足,唔係太覺甜味,卻帶出咗抹茶嘅香味~


培茶啫喱雪糕 - 只限星期五、六、日發售。培茶即係烘焙過嘅日本煎茶,炒過嘅茶葉,色澤金黃,茶味更加香濃。第一次食培茶味雪糕,感覺比起抹茶味冇咁重奶味,較為純正。雖然顏色未必討好,但我就係鍾意佢夠天然、低調。諗番起都好回味呀!茶控朋友一定要試試!


抹茶芝士蛋糕 - 蛋糕茶味濃厚,餅底脆身,味道啱啱好唔會太甜,茶香亦都好出,但可惜份量小咗啲~ XD

抹茶一向同紅豆係絕配,冇得輸!但呢球抹茶雪糕嘅口感同軟雪糕好唔同,質感比較厚實,味道同樣茶味濃郁。絕對係下午茶之選!


晴晴食完自己果個就想嚟分一杯羹,哈哈!食物係要分享先更好味嘅!即管畀妳試試,不過兩啖好喇!XD


壓逐出場嘅係香港限定芭菲,軟雪糕同之前一樣,唔駛多解釋。一個字 -「正」!我反而想講多少少雪糕下面嘅食材,包括有白玉丸子、抹茶啫喱、厥餅、脆米、紅豆蓉、鮮草莓,食出一層又一層唔同嘅口感,食得多都唔怕滯~


脆米新鮮脆卜卜,最欣賞嘅係抹茶果凍,質感煙煙韌韌又軟滑。整杯芭菲好有層次感,材料亦非常豐富~

餐牌分咗主菜、甜品同飲品,等我同大家分享一下甜品類啦!^^
(可按圖放大)


食飽甜品好滿足呀!Wow~ hoo~

唔知抹茶熱潮係幾時興起嘅呢?抹茶食品種類真係越來越多呀!所有抹茶味嘅食物,都會吸引到我哋注意!今次試過培茶味雪糕後,簡直一試難忘。炒過嘅茶葉,茶味更香濃。而且培茶係經過較高溫烘焙,不少茶葉中嘅咖啡因都已經揮發咗,所以焙茶嘅咖啡因含量亦較低,咁就食得更健康喇!京林屋嘅食材係由日本新鮮空運抵港,唔怪之得咁新鮮啦!下次想試埋佢哋嘅鰻魚飯、稻庭烏冬同茶味飲品,如果個胃仲有位,仲想encore多次甜品添!咁可能要約多幾個friend一齊去先得喇!

京林屋 Kyo Hayashiya
地址:銅鑼灣軒尼詩道500號希慎廣場12樓1203號舖
電話:3580 1838, 2960 2925
facebook:https://www.facebook.com/kyohayashiya.hk


FIND US on:
     

BLOGs:

CONTACT US:

沒有留言:

張貼留言