2017年7月20日 星期四

【變走白髮】Liese Blaune泡泡染髮劑

未有小朋友之前已經好怕去髮型屋做一啲較長時間嘅treatment,好似染髮、焗油,甚至最難頂嘅負離子,真係會坐到洽眼瞓㗎!有咗小朋友後,時間就更加之寶貴。相信媽媽們都好明白,有時間都留番畀小朋友啦!仲邊會有咁多空餘時間去扮靚喎!由生完朗朗開始有第一條白頭髮,白髮問題就一直跟住我。怕去salon又想搞掂啲白髮,咁就要靠自己喇!近排試咗一款易用又快染好嘅染髮劑,好想介紹畀大家呀!
Liese Blaune泡泡染髮劑 $74.90(SaSa價)


呢個系列專為摭白髮而設,真係唔認老都唔得喇!^^'''


摭白髮系列有7隻色:淺紅棕色、醉紅棕色、淺金棕色、柔亮棕色、栗子棕色、深濃棕色、柔黑棕色

我揀咗唔淺唔深嘅栗子棕色,希望摭到啲白髮之餘,又可以做到啡啡哋嘅效果~


產品聲稱只需簡單搓下捽下,泡泡嘅密度足以將染髮劑帶到去每根髮絲,深入滲透,染髮+摭白髮話咁易~


真係估唔到盒裝內裏放到咁多嘢!@.@

包括咗皮膚測試咭、藥水1號及2號、修護素、手套、泵頭同說明書~

由於未曾試過染髮導致皮膚過敏,所以一開波就染喇!

大家認為有需要嘅可按說明書指示做咗測試先進行染髮,其實咁係穩陣啲嘅~

不過心急人係唔等得㗎!XD


首先將1號藥水倒落去2號


然後慢慢上下倒轉搖下佢,等佢哋混合埋一齊,唔駛好大力,溫柔咁慢慢正反倒轉就ok!


將泵頭扭入去2號藥水嘅樽度,然後戴上手套~


慢慢擠壓樽身嘅中央位置,擠出泡沫於手上~


響頭髮上搽上大量泡沫,邊搽邊搓,泡泡變得越來越多。重災區響頭頂,所以就由呢度開始搽~


唔駛一陣就捽混晒整個頭喇!我覺得自己有啲似一隻公仔,呢~ 個頭五顏六色,據聞摸下佢啲頭髮會帶來幸運㗎呢!

唔知我講梗咩?唔緊要!有圖有真相~


原來叫做Troll Doll,真係唔search下都唔知!XD

言歸正傳!20分鐘後就可以去洗頭+用Liese送嘅修護素喇!

洗完頭,成個頭都帶有淡淡嘅修護素香味,好like呀!

吹完頭,好心急!睇睇效果先~


頭頂位置:本來白髮好明顯,有啲仲一支支棟晒響度,但染後已經唔見晒喇!*o*


右側位置:呢邊都多白髮㗎!但染完之後,已經唔多覺眼喇!^^V


左側位置:呢邊相對頭頂同右側冇咁犀利多白髮,可能就係咁輕視咗,染完都依然見到耳仔上面有一(汁)白頭髮~

不過整體嚟講都算滿意,收貨啦!


說明有講如果染完效果唔理想,可以揀偏深色系。我覺得染完之後,都摭咗約八至九成白髮。下次會試深色一級,睇下效果會唔會更好先~

以前用過一啲染髮劑染嘅時間比較耐,Liese呢款只需20分鐘,快好多呀!而且就咁捽晒上個頭度就係,比起一般果啲要用隻梳慢慢梳晒上啲頭髮度嚟得快捷方便。仲要真係感覺到啲泡泡滲梗入去頭髮底層,比起梳極都梳唔到底果啲效果更加好呀!又要靚,又要懶,當然係揀快靚正嘅產品啦!不過染完大概一個月又會開始見到少少白髮生番出嚟!兩個月染一次就差唔多喇!咁好用,我買多咗兩盒送畀老人家用添呀!大家都快啲試試啦!


Liese Blaune泡泡染髮劑
官方網址:http://web.kao.com/hk/liese/color/blaune


FIND US on:
     

BLOGs:

CONTACT US: