2016年12月13日 星期二

冰雪公主 The Frozen Princess Cafe

大家會唔會都好似我哋咁,食完飯硬係想食番啲甜嘢先安樂㗎呢?食甜品係女人嘅專利嚟加嘛!行到熱熱哋咁啱經過「冰雪公主」,聽個名已經感覺好涼快喇!一於貢入去"let it go"一番囉!
「冰雪公主」位於荃灣廣場附近嘅享和街,門口有大大張banner歡迎Pokemon Go愛好者入去嘆美食兼快取精靈球。啱晒一眾Pokemon迷啦!


甜品款式好多,款款都咁吸引,揀邊款好呀?我哋嘅選擇困難症又發作喇!XD


店內地方寬敞,座位舒適,而且裝修得好有雪國風味添呀!


晴晴一坐低就話見到雪人!Happy Snowman~~


呢度係自助式點餐,我哋出去落咗order喇!等待食物嘅時間係最心急㗎!


叫咗兩款甜品,承惠$107。呢度每人最低消費$30,我哋夠晒啦!


朱古力曲奇雪花(細) - 嘩!叫細杯都咁大杯嘅?好足料喎!塊oreo餅同埋啲朱古力溶漿已經夠晒吸引喇!


我唔客氣喇!呢款係晴晴揀嘅!但似乎要媽媽幫忙先食得晒喎!好啦!啟動囉!~~


除咗oreo餅、朱古力雪糕外,仲有一粒粒煙煙韌韌嘅東西


曲奇碎份量十足,撈埋韓式雪花冰好夾,好好味!最正嘅係唔會食食下冇晒曲奇碎,食完一層冰又會見到新一層嘅曲奇碎,可見店員嘅細心同有heart嘅製作。好滿足呀!


香蕉酥皮卷配雪糕 - 賣相已經好吸引喇!係下午茶嘅必食推介!


第一啖梗係要試下香蕉酥皮卷先啦!


酥皮卷帶有少少甜味,香滑軟熟。配以香蕉同埋朱古力漿一齊放入口,口感冇得彈!


點少少雪糕咁食,雪糕凍,香蕉卷暖。果種一冷一熱撞埋一齊嘅味覺,好正呀!


其實呢度環境好似一間cafe,甜品店嚟講都算大間。響呢度hea住咁嘆番個tea,簡直係人生一大樂事~


洗手間都有3格,比起一般餐廳設備更完善~


食飽飽,大滿足!又係時候講拜拜喇!


同朋友前後腳,緣慳一面。見到佢啲相先知原來店內提供好多board game,除咗相中嘅蘋果棋、波子棋、層層疊之外,仲有鬥獸棋、象棋、Uno、疊櫈仔等考IQ嘅智力遊戲。咭類遊戲除咗Uno都仲有好幾款,木製玩具都好多,下次再去嘅時候一定要hea住玩住咁嘆甜品呀!

Let it go~ let it go! 「冰雪公主」營造咗一個冰雪天地出來,我哋下次係咪要著番套Elsa & Anna裝束襯番先得呢?好鍾意呢度舒適嘅環境同美味嘅甜品,響度hea下玩下真係唔錯!為繁忙嘅都市,帶來一個喘息偷閒嘅好地方!


 冰雪公主 The Frozen Princess Cafe 
地址:荃灣享和街57A號都城大廈地下A舖
電話:2812 2981 / 2812 2121
facebook:https://www.facebook.com/thefrozenprincesscafe

沒有留言:

張貼留言