2017年3月15日 星期三

【燃點希望】登記成為骨髓捐贈者

曾經轟動一時嘅「救救小哥頓」運動大家仲記得嘛?小哥頓觸動咗好多香港人心,短短幾個星期已經超過萬人登記捐骨髓。雖然最終未必個個都能夠幫助到小哥頓,但大家都有着相同嘅救助精神。最近新聞報導有位6歲小妹妹患上血癌,如果搵唔到合適嘅捐髓者,就只剩下三個月生命。新聞令我想起小哥頓,想起當時還小的我,幫助人嘅衝動又再次燃起。心動不如行動,大家都一齊起動吧!
其實捐骨髓未必係大家諗得咁可怕,一於去就近嘅紅十字會捐血站了解下,順便做埋登記啦!


登記手續好簡單,首先簽一份參加同意書,然後填兩頁簡單嘅健康評估問卷~


去到大堂等一陣,好快就到我去見姑娘喇!


入到房,姑娘同我核對一下資料,再問幾條問題確認係咪乎合資格~


跟住又出番去大堂等候抽血。朗朗全程陪伴等候,仲幫手影相添!巧乖唷~


接過骨髓捐贈咭同紀念品後,姑娘就忙幫我準備抽血嘅用具喇!


話咁快就抽好5ml血,好新鮮嘅血呀!朗朗仲問我痛唔痛。其實頭先忙住叫朗朗幫手影相,捕捉重要時刻。幾時吉咗針,幾時痛都唔知喇!^^'''


唔知點解抽血果個係我,但需要食餅乾補充體力果個竟然係朗朗囉!XD


成功登記喇!好開心!仲有個咁精美嘅襟章送添!Yeah!!! 一旦登記,資料就會keep到去60歲。其實要搵到吻合嘅骨髓有啲似大海撈針,有可能永遠都冇人聯絡我作進一步檢驗㗎!不過對患者來講,總算多一個希望啦!

不時都會有血病患者需要援手,我身邊都有朋友一直等待合適骨髓嘅出現。幸運嘅,就可以由親人捐贈。但如果在親屬中搵唔到合適骨髓,就只有在眾多志願捐髓者中尋覓。可能好多人一聽到「捐骨髓」就會聯想到好痛,好可怕!呢啲都係一般人嘅誤解。根據捐贈者講番,捐後感覺就好似做完劇烈運動果種肌肉酸痛感覺。相信大家都經歷過肌肉酸痛,其實唔係想像中咁得人驚。生bb仲痛啦!所以,駛乜驚呀?聽到呢度,仍然係有啲擔心?唔緊要!其實登記唔等於捐贈,如果有患者嘅白血球組織同你吻合,先會有人聯絡你作進一步檢驗,至於最終捐贈決定權都響你手上。如果大家都有一顆助人嘅心,就唔好遲疑喇!拯救生命,刻不容援!多一個人登記,患者便多一個機會,絕望中多一點曙光!

 登記資格:
● 身體健康狀況良好
● 沒有已知傳染病
● 18至60歲人士

捐贈方法分兩種:骨髓捐贈同埋周邊血幹細胞捐贈。至於最終用邊一種方法要視乎捐贈者意願、捐贈者身體狀況、病人需要同埋醫生建議。兩種方法詳情如下(可按圖放大):

各區紅十字會捐血站:油麻地西九龍旺角觀塘中環銅鑼灣沙田荃灣元朗

有關6歲小妹妹求骨髓續命嘅新聞:
http://news.stheadline.com/dailynews/content_hk/2017/03/07/402408.asp

 骨髓捐贈詳細資料:
http://www5.ha.org.hk/rcbts/hkarticle.asp?bid=56&MenuID=6#.WMfxTDuGNPY


晴朗 - 食·玩·育·美·愛の親子平台
facebook專頁:https://www.facebook.com/happytrain123
blog:http://blog.xuite.net/chinglongtin/blog

沒有留言:

張貼留言