2017年3月6日 星期一

親子遙控車天地@D・Park愉景新城

搖控車係男孩子嘅專利?No no no....其實女孩子玩起上嚟都唔會輸蝕比男孩子㗎!我就見過幾位女車手喇!唔信?一齊嚟睇下啦! 
玩搖控車就梗係要有合適嘅場地啦!嚟到D・Park最新嘅搖控車天地,有專家特別設計嘅賽車跑道。好pro呀!*o*


一系列新款遙控車任君選擇,款款都咁型仔,點揀好呀?


當我仲心大心細揀邊款嘅時候,啲小朋友經已揀好晒!選擇困難症發作真係唔夠佢哋嚟!好啦!搖控車旅程隨即展開~ gogogo~~


對於未曾玩過搖控車嘅晴晴嚟講,可能需要啲時間掌握。唔緊要,慢慢嚟啦!


睇睇其他小朋友嘅技術先!好似都不停撞喎!呢部車尾撞欄~


果部就嚟撞喇!好彩殺得切掣啫!


見晴晴仲未太控制得到,等媽媽都嚟幫下手啦!原來而家已經發展到手指操控嘅力度可以控制車速,又幾好玩喎!


講到技術,當然要請教專業人士啦!晴晴開始上手喇!


控制得唔好?唔緊要!擺番好個靚位再嚟過!


男孩子們似乎正在切磋技術喎!玩得不亦樂乎~


賽車場上難免會有意外發生。嘩!成㗎撞到飛起咗呀!睇怕朗朗都要去上番個駕駛改進課程先得喇!XD


女孩子就玩得斯文得多喇!唔會亂衝亂撞,仲逢彎過彎,好有滿足感呀!


維修好嘅車又可以再次加入比賽行列,快啲追番幾個圈啦!


衝線喇!過終點嘅一刻,心情勁高漲呀!


短短15分鐘,個個都變咗賽車手。好犀利呀!Yeah!!!

我哋細個玩搖控車多數都係出走廊玩下,最多咪落街玩。邊會有跑道同賽車場丫!而家啲小朋友真幸福。既然有咁好嘅資源,梗係要好好把握啦!玩搖控車唔單只刺激好玩,過程中仲可以訓練小朋友嘅手眼協調、邏輯思維、反應能力、協調性同專注力。小朋友們一齊競技同互動,仲會提升埋人際社交智能添!未試過玩搖控車玩得咁專業,連大人都覺得好玩呀!大家都快啲帶埋小朋友一齊嚟飛番轉,掟番幾個靚彎啦!


親子遙控車天地
對像:5-12歲
地點:荃灣青山公路398號愉景新城L1童趣森林親子運動營
活動時間:12:00 ~ 19:00
費用:$30/15分鐘
網上預約:https://goo.gl/A5n0DA