2017年5月4日 星期四

【宜蘭親子遊】紅樓

在計劃宜蘭行程嘅時候,剛去完宜蘭嘅朋友極力推介我試紅樓嘅櫻桃鴨,話唔試一定會後悔喎!既然講到咁,我哋又點可以為自己製造遺憾呢?一於去試一試,睇下係咪真係傳說中嘅不可不吃先~
紅樓係蘭城晶英酒店嘅中菜廳,做得酒店餐廳,水準一定有番咁上下~


我哋點咗一個櫻桃霸王鴨五吃嘅特餐,台幣$4200+10%,即大約港幣$1231。係我哋響宜蘭食得最貴嘅一餐呀!@.@


餐廳其實響新悅廣場上面,行shopping mall少不免會買番多少嘢啦!XD 晴朗在誠品嘅收穫,響等待食物期間就大派用場喇!


等咗一陣,就有位大廚嚟到我哋枱邊服務,佢片鴨嘅技巧好純熟,大開眼界呀!


旁邊有助手將新鮮片落嚟嘅烤鴨皮做成手握壽司,亦有職員負責講解,好大陣仗咁~ XD


嘩!傳說中超吸好味嘅櫻桃鴨握壽司,賣相果然唔錯!


烤鴨塊皮好脆!包住嘅係濃郁芝士+酸酸哋嘅壽司飯。食到咯咯聲!鴨嘅油脂遍佈味蕾,好香!真係超好味呀!不過要趁熱食先唔會影響烤鴨脆皮嘅口感。我而家終於明白朋友點解會極力推介喇!果真好吃~


晴晴都大口大口咁食,太好味喇!*o*


時令海鮮 - 蝦肉爽滑彈牙,好新鮮!配埋酸酸甜甜嘅醬汁,開胃之選!


香滷鴨小拼 - 鴨翼、鴨脷同滷水汁簡直係溶為一體,煮到好入味!啲肉好淋,好易咬落嚟!旁邊酸酸甜甜嘅配菜,啱啱好可以去除口中嘅油膩感。配合得好好!鍾意食滷味嘅朋友一定鍾意!


冰糖荸薺 - 魷魚肉厚爽口,配埋酸辣汁,冇得彈呀!


五香牛腱 - 呢度啲滷水汁真係煮得好好!牛腱食起嚟又香又嫩,牛筋部分都好軟熟,送飯一流!


片皮鴨捲三星蔥餅 - 有兩款味道,一款係用生蔥,另一款嘅蔥係炸過嘅!秘製捲皮包住蔥同片皮鴨,又一次感受到鴨皮嘅香脆!我比較鍾意生蔥捲,果種蔥辣同片皮鴨撞埋一齊簡直係絕配呀!


成枱食物滿滿的,好豐富!食到我哋lam lam脷!仲未完!食物仍不斷上枱中~


蟹粉海鮮豆腐煲 - 蟹粉嘅氣息濃郁香甜,配埋香滑豆腐,又係好好送飯~


生菜包鴨絲 - 響烤鴨上面片落嚟嘅肉切絲炒起,香味四溢!用嚟做生菜包,原來咁夾!好味呀!


梅子醋(左)配搭烤鴨係最佳選擇!而西瓜汁(右)係新鮮即榨,好啱小朋友飲~


最後仲有芝麻糊一大窩,食到呢個moment其實已經飽到上心口。不過好甜嘅我又點會放過?芝麻味好濃厚,而且杰嘅程度好啱我口味!總算為我哋豐富嘅午餐劃上咗完美嘅句號。飽~


食飽之後,去咗餐廳附近嘅花園平台睇水池同鬆一鬆。晴朗突然扭身扭勢跳起舞來,心情極之好!我哋都趁呢個時間鬆下個大肚腩先!XD

一鴨五吃果然勁!好味之餘,份量仲十足!我哋同埋包車司機簡直要抱着肚子走呀!估唔到烤鴨除咗面層嘅脆皮好味之外,鴨肉都好好味!唔怪之得佢響「台灣十大讓人流口水的烤鴨」攞第一名啦!真係實至名歸!我最欣賞嘅係櫻桃鴨握壽司,真係諗番起都流口水喇!每道菜都煮得咁好!朋友果然冇介紹錯!不過最好搵多啲人嚟開心share,咁就可以試多啲款式,又唔會食剩晒啦!今餐真係大滿足!


紅樓
地址:宜蘭市民權路二段36號6F
電話:03-9101011
網上預約:http://www.silksplace-yilan.com.tw/n/food_booking.html
營業時間:11:00~15:00, 17:00~21:00


FIND US on:
     

BLOGs:

CONTACT US:

沒有留言:

張貼留言