2017年5月9日 星期二

【宜蘭親子遊】藝景居 & Royal House

香港人真係好鍾意去旅行,尤其係有小朋友嘅媽媽們,更加渴望可以釋放平日湊小朋友疲倦嘅身心,鬆下抖下休息番下。帶小朋友去宜蘭旅行,我哋一定會揀親子民宿。對於去旅行住慣酒店嘅朋友嚟講,可能會擔心唔知住唔住得慣。但其實OK㗎!因為民宿都可以有酒店級水準。絕對冇錯,跟住嚟睇下啦!
藝景居 & Royal House係由兩棟民宿組合而成,左邊果棟係Royal House館,房間包括海之堡、紫藤屋、暮櫻居。而右邊嘅係藝景居館,包括咗櫻之宿、冰之城、藍之洞。所以睇落比起一般民宿大座,格調都十分唔同~


行樓梯上一層可以見到連結起兩座民宿嘅通道,玻璃天窗設計,自然光打進屋內,好舒服呀!


通道兩旁都設有休憇區~


可以坐低欣賞一下風景,幾咁寫意呢!


旁邊有茶水間,有水機同茶包~


仲有雪櫃添!設備都好齊全喎!


我哋入住嘅係藝景居 -「櫻之宿」,即將就會揭開呢間房嘅神秘面紗,係咪好緊張呢?^o^


咪咁心急住,攞張匙咭嚟開門先啦!do一do,門就開,好方便呀!


開門之後,係一條通往房間嘅樓梯。在水晶燈照耀之下,興奮嘅心情越來越澎湃~

到達房間嘅時候,我哋都「嘩!」咗一大聲,估唔到間房咁大間呀!*o*


向左走係睡房,拉開趟門,一齊入去睇下囉!~


嘩!估唔到睡房會有條獨立滑梯,簡直係小朋友天地。晴朗變得十分瘋狂!不斷咁抱隻大bear bear上去瀡滑梯,已經進入咗忘我境界喇!*o*


bear bear話唔該晒喎!XD


佢哋好鍾意隻大bear bear,就當咗係一隻活生生嘅熊咁,一齊享受瀡滑梯嘅樂趣~ ^o^


循環不息地bear bear瀡,晴晴瀡,然後到朗朗瀡,咁樣唔攰㗎咩?~.~


瀡完一次又一次,睇嚟佢哋都有排玩。就趁呢個時候,睇下房間其他設施啦!


「櫻之宿」主題明顯同大自然有關,滑梯果邊有彩虹同雀仔,床呢邊就有棵大樹。床單以簡潔白色為主,被鋪上亦有花花圖案。我哋就好似融入咗大自然世界一樣呀!


向右走係客廳,牆上有一個一個嘅小樹屋,每一個都載着小盆栽,綠化環境感覺好舒適~


電視機牆上有可愛小白兔和小青蛙,房間grand得嚟亦不失童趣味道,好啱一家大細嚟住呀!


客廳隔離有個露台,正!出去睇下風景囉!


樓下環境都唔錯喎!有涼亭又有泳池~


仲唔只一個泳池添!如果夏天嚟就啱晒啦!

望出去嘅風景好靚呀!有山有水,咁先似係度假加嘛!*o*


椰林樹影,同對面間屋相距都有好一段距離,地多人少咪就係有呢個好處囉!


房間對住好大塊稻米田,四周圍都好green,望得多對對眼都好啲啦!


周圍被田景同山林所環繞,就好似去咗世外桃園一樣~

umm....好fresh呀!深呼吸一口清新空氣,身心十分舒暢~

睇完房間外面,就繼續睇裡面啦!


就連洗手間都有動物,見唔見到條青bb鱷魚?原來係防滑地墊嚟㗎!XD


洗手間好大,而且設備仲好齊全添!


兒童廁板、嬰兒沖涼液、浴鹽、豬豬水兜、風筒一應俱全~


座廁隔離有個大浴池!*o*


晴朗一見到已經話想落去游水喇!哈哈!一於夜啲嚟番個pool side party囉!^o^


大浴池旁設有淋浴間,玩完水過嚟沖身就啱晒啦!


洗頭水同沖涼液都有提供,而且係有機㗎!果然high class~


參觀完房間每個角落後,晴朗仲係同大bear bear玩得十分興奮,真係服咗佢哋喇!^^'''


仲發現咁樣同大bear bear一齊瀡滑梯,一次過瀡晒三個,快靚正添!XD


但係大bear bear嘅眼神好似唔多enjoy咁喎!^^'''

不如我哋落去睇睇有咩嘢玩囉!

晴朗終於肯放低大bear bear,我係佢嘅救星呀!XD


一落到去又大玩搖搖櫈,佢哋似乎咩嘢都可以玩一大餐!XD


不如過嚟睇下兒童遊戲室有咩嘢玩啦!呢度嘅佈置好warm,好有「家」的感覺!晴朗已經進行梗大搜索喇!


先嚟玩下煮飯仔,有咩嘢煮畀我食呀?餓死人咩?


嘩!好豐富喎!唔該晒!^^


有朗朗至愛嘅lego,發達喇!


晴晴就話要用小結他彈奏一曲愛媽媽嘅歌,好窩心呢~^^


朗朗亦都要做伴奏,好用心去夾band!但其實我唔係太識欣賞~ XD


牆上嘅書櫃有好多唔同種類嘅書藉,好吸引呀!


響咁美好嘅環境之下,小朋友都自發性閱讀喇!

出去四圍逛逛,睇下地面呢層仲有咩嘢先~


reception隔離係一間餐廳~


晚上亮起紫色燈光,好有情調呀!


天花燈就好似一點一點嘅小星星咁,好靚!

我哋聽朝就會響呢度享用早餐,但早上嘅感覺又會好唔同,繼續睇落去你就會知㗎喇!

番到房間第一件事,知唔知做咩丫?


就係晴朗熱切期待嘅玩水時間囉!水正預備中~


唔知晴晴同大bear bear有咩密計傾得咁開心呢?


電視做梗比卡超呀!又會夜晚都有卡通片睇咁好嘅?


晴朗有電視睇梗開心啦!但啲水差唔多預備好,可以入去玩水喇!~

第二樣又唔見咁快,一聽到有水玩就即刻衝入去脫衣喇!XD


玩水囉!可以盡情咁玩,幾開心?玩到手腳皺晒皮都唔捨得沖涼,似乎真係好好玩呀!


今日行程十分緊密,攤在床上,望住裝修得咁靚嘅環境,唔覺唔覺就瞓著咗,比晴朗還要早睡了~

過咗寧靜嘅一個晚上,瞓得好好呀!


出去露台呼吸到新鮮空氣,亦可以感受到太陽嘅溫暖,此情此景,好hea,嘆到秘!XD


唔記得同大家講,樓梯間設有一度小木欄,可保障小朋友安全。好細心!一朝早,自己出去走走,細味民宿每個角落先~


連接兩棟民宿嘅通道兩旁都有座椅,可以畀住客坐低靜心細看風景~


呢邊可以望到稻米田~


而另一邊呢?


就可以望番去前院嘅停車場、大閘同埋對出一片綠油油嘅農田~

講開大閘,用房間匙咭就可以開閘畀車輛出入㗎喇!係咪好先進呢?


呢度就係民宿嘅大門喇!唔需要好富麗堂皇,簡潔舒適反而更吸引遊客入住~


大門兩旁設有座椅,真係隨時都可以坐低休息一下,悠閒嘅心情咪就係我哋去旅行嘅目的囉!


民宿後面有個小庭院,環境十分優美~


真係冇諗過民宿都會有埋泳池,好驚喜!有機會夏天要再嚟過呀!


一家人坐響賞風亭休息,傾下計,欣賞一下湖光山色,你話幾咁溫馨呢?


韆鞦同沙池係專為小朋友而設嘅啦!等陣食飽早餐一定要嚟玩番轉~


鍾意嘅亦可到籃球場大展身手,附近仲有單車及器材室添!其實就咁留響民宿已經大把嘢玩喇!


地面嘅茶水間仲多茶包選擇喎!咁就行到去邊都可以嘆番杯啦!^^

早餐時間差唔多,要上番去睇下晴朗梳洗好未喇!


呢度就係尋晚紫色嘅餐廳區域,日頭感覺係咪唔同晒呢?


嘩!早餐好精緻,亦好有和風味道呀!唔好睇佢份量少少,但原來已經足夠我哋一家人食喇!


用宜蘭米煮出嚟嘅粥特別香!我唔客氣喇!


食飽仲有咖啡、烏龍茶、冰綠茶,任君選擇!好豐富呀!


響環境咁好嘅地方嘆美味早餐,好悠閒、好寫意!食物同飲品都食到一滴不剩,我哋戰鬥力超強!


食飽飽又去玩過囉!餐廳門外有個木製嘅小韆鞦,可以幫小熊熊打韆鞦㗎!晴朗都輪流推小熊熊,好有愛心喔~


小熊熊打完韆鞦,就到我哋喇!盡情地打囉喂!yo~ hoo~~


再過沙池玩沙,將沙倒入去玩具,齒輪就會轉動,慢慢流番落沙池。好好玩呀!


玩完一大輪,係時候要執行李,預備check-out喇!晴晴把握最後機會同大bear bear道別,好可愛呢~


晴朗穿著民宿提供嘅小拖鞋落樓梯,好襯佢哋,好得意!


check-out期間,不忘與小熊熊和維尼熊道別~


拜拜喇!大bear bear、細bear bear,仲有魚魚仔~


呢位就係民宿屋主,各大小事務同埋早餐都係由佢同家人一手包辦,真係唔簡單呀!感謝您們啊!

我哋之前只係從網站睇過幾張房間嘅相片,冇諗過民宿原來咁有水準,無論設備同設施都帶畀我哋好多驚喜!民宿到處都有坐椅,可以讓人停下腳步細賞風景,十分悠閒自在。響呢度真係行步路都慢啲呀!其實有咁多嘢玩,就咁留響民宿已經可以享受假期嘅精彩啦!真係不得不讚嘆藝景居嘅裝潢時尚、設備先進,grand得嚟亦不失童趣。晴朗好鍾意房間嘅滑梯,玩足兩日都唔厭。屋主一家都好好人呀!為我哋煮出咁豐富嘅早餐,廚藝亦十分了得。好滿意呀!可以感受當地人生活文化之餘,亦可以享受高水準嘅住宿,值得推介!


 藝景居 & Royal House 
地址:冬山鄉鹿得三路161號
電話:0982258332 陳小姐, 0916220518 林先生
網址:http://www.royalhouse.tw
facebook: https://www.facebook.com/yijingiu


FIND US on:
     

BLOGs:

CONTACT US: