2017年9月22日 星期五

【舒適寫意】Cafe Panorama@澳門鷺環海天度假酒店

豐富嘅早餐,係一天嘅好開始!每次預訂酒店,我都會選擇包埋早餐,貪佢一落樓就有得食,唔駛餓住個肚四出搵食丫嘛!
Cafe Panorama位於鷺環海天度假酒店,環境優美、景色怡人~


晴晴知道有大餐食特別醒神呀!(嚇親後面個鬼佬添~XD)


最吸引晴朗嘅梗係甜品啦!晨早流流就食甜品?不過我都有啲心郁郁~


一次半次冇緊要啦!即管睇睇有啲咩食先~


蛋糕、酥、餅都有九款,應該係十款至啱!有一碟迷你牛角酥沽清咗!好想每款試下呀!*o*


早餐嘅話,方包一定唔少得啦!仲有長條法包,任君選擇。可以放入多士爐烘番熱暖笠笠咁食㗎!


唔同味嘅果jam同牛油都齊備,啱晒唔同人口味啦!


仲有幾款曲奇餅任揀,鍾意食甜點嘅我哋又點會錯過呀?^o^


影完相番到嚟見個個都開梗餐,樣子好滿足喔!輪到我出去搵食喇!


頭盤當然食咗啲「輕ken」嘢先啦!去沙律吧睇睇囉!


蔬菜、水果、芝士、沙律、火腿....款款都好新鮮,每樣都試小小囉!XD


麵包再加啲黑醋同橄欖油,好好味呀!


熱食方面就有煎煙肉、腸仔、蕃茄同埋我最欣賞嘅薯餅,新鮮熱辣脆卜卜,食完再添,唔覺唔覺食咗好多塊~ @.@


waffle, pancake可以加牛油同醬汁,自由配搭~


原隻白烚蛋同炒蛋係晴朗嘅至愛。另外,奄列可以自選口味~


點心、白粥、炒麵唔只啱中國人口味,連鬼佬都好捧場,加啲香蔥同油炸鬼就變成美味嘅中式早餐喇!


乳酪有3款口味:藍莓、雲呢拿同菠蘿,有果粒幾好味!加少少乾果類同香蕉片落去更加滋味~


仲有多款粟米片提供~


飲品就有橙汁、蘋果汁、菠蘿汁、番石榴汁、全脂奶、脫脂奶同豆漿,呢度嘅早餐buffet都算豐富喎!


如果天氣冇咁熱,坐室外園林位仲正呀!


buffet附設彈床畀小朋友任玩,但係食飽隔一陣先好去跳呀!唔係肚仔肚就唔好啦!^^


跳完彈床仲可以到酒店遊樂場玩添!


臨走嘅時候,見職員正忙著為小朋友生日會作準備。露天茶座附近又有草地,環境被海天所包圍,響呢度搞生日會都唔錯喎!

好多人到澳門搵食,焦點都落咗響巿區嘅餐廳,而忽略咗遠離鬧巿嘅路環區。在路環嘅Cafe Panorama感覺好唔同,既悠閒,又有渡假feel。酒店附近都係海景、山景,湖光山色盡入眼簾,響呢度真係別有一番風味!早餐buffet嚟講,呢度選擇唔算得上好多,但都有齊中、西式食物,種類算係應有盡有。我哋放到成枱都係食物,飽到要抱著肚子走呀!環境好、服務又好,感覺十分舒適寫意,我哋好鍾意呢度。雖然位置近海,交通唔太方便,但由氹仔搭的士嚟都係5~10分鐘咋!值得推介!食飽飽,又係時候繼續下一個行程喇!旅行嘅時光真好啊!

餐廳最近做梗特色燒烤自助餐同印度及泰國自助晚餐,好似都幾抵食喎!有興趣嘅朋友不妨睇睇啦!


Cafe Panorama
地址:黑沙海灘黑沙馬路1918號鷺環海天度假酒店大堂
電話:(853) 8899 1020
網址:http://www.grandcoloane.com/eat/caf-a-panorama1.htm


FIND US on:
     

BLOGs:

CONTACT US:

沒有留言:

張貼留言