2017年9月7日 星期四

「恒生 — YMCA 快樂『球』學計劃」結業禮暨氣球藝術展

仲記得小時候每年學校聖誕party都總會有踩波遊戲,畀同學追住嚟踩爆綁在腳上嘅波與及響亮嘅爆波聲仲歷歷在目,每次都覺得好可怕,我...其實係好驚踩波呢個遊戲。但自從有咗小朋友後,晴朗媽媽好似變咗超人咁,好多以前驚嘅事,而家都變得唔再驚喇!上星期同晴朗一齊去參加咗個扭波活動,竟然可以陪住佢哋一齊揸住啲充滿氣嘅氣球嚟玩,可怕得嚟又有幾分樂趣。同大家分享一下當日活動啦!
YMCA屬下社企 - YM Balloon嘅一批「恒生—YMCA快樂「球」學計劃」學生畢業喇!

畢業當然要有畢業禮啦!一眾學生帶住興奮期盼嘅心情上台領取畢業證書~

YM Balloon於2016-2018學年推行「恒生—YMCA快樂「球」學計劃」,合共開咗40班,以小班教學形式免費培訓咗320名特殊教育需要(SEN)學生有關氣球藝術,課程為學生度身訂造,而且由恒生銀行全力支持㗎!


場內設有多塊由SEN學生製作嘅氣球牆,設計好有特色呀!


每一塊氣球牆都有唔同動物主題,埋去睇清楚啲囉!


晴朗正研究呢一塊主題係咩嘢動物,大家又估唔估到呢?


老虎冷知識:每隻老虎嘅斑紋都係獨一無二,正如人類嘅指紋一樣

SEN知多啲:每位SEN小朋友都係獨一無二㗎!


中華白海豚冷知識:海豚瞓覺時隻眼開、隻眼閉,半個大腦維持清醒狀態
SEN知多啲:自閉症譜系小朋友對環境敏感度不足或官能刺激反應過度,容易出現睡眠問題


小葵花鳳頭鸚鵡冷知識:鸚鵡善於模仿聲音,甚至可以模仿超過1700個人類單詞
SEN知多啲:自閉症譜系小朋友同鸚鵡一樣,有時會不斷重複單詞


海龜冷知識:海龜出生後成世都唔會見到爸爸媽媽
SEN知多啲:SEN小朋友都有爸爸媽媽嘅愛錫


鯨魚冷知識:鯨魚雖然叫「魚」,但其實同人一樣都係哺乳類動物嚟㗎!
SEN知多啲:SEN小朋友都係小朋友


鯊魚冷知識:有啲鯊魚需要不停游動,停落嚟就會因為呼吸唔到而死亡
SEN知多啲:小朋友不停咁郁,可能同大腦額葉及其他結構發展有關

透過唔同動物嚟介紹SEN學生同動物嘅相似特質,好有趣味,我哋對SEN小朋友又了解多咗喇!


場內亦設有攤位提供唔同嘅工作坊畀小朋友免費參與~


仲可以上台同氣球師進行互動,一齊扭出唔同嘅氣球造型添!


不過下一組先到我哋,晴朗又趁空周圍逛逛,最吸引佢哋嘅都係多塊精美嘅氣球牆喇!


咦!我哋留意到某一個角落擺放咗好多動物形狀氣球,見唔見到有貓頭鷹、蛇蛇同鯊魚呀?


係咪狐狸同海龜呀?


大熊貓、大笨象~


隔離仲有兔仔、獅子、海豚、青蛙同長頸鹿添喎!


原來所有動物都上晒一艘船度,莫非係挪亞方舟?好巨形!球藝技術一流呀!


上一組已經完成咗佢哋嘅大笨象氣球作品,唔知我哋呢組又會整咩呢?好緊張!


為保持神秘感,唔講畀大家知將會扭咩氣球住,等大家慢慢估下先!我哋似乎信心十足呀!(但完全冇經驗...)


要成為氣球師,先要條件當然係唔驚氣球先啦!晴晴好似OK喎!仲強過媽媽~ XD


晴朗與及晴朗爸爸都著手開始學習喇!大家都覺得好有新鮮感,始終未玩過嘛!


扭好咗一部份,就傳過去畀晴朗爸爸組件,效率幾好喎!


咦!...調皮晴朗又開始發作喇!將啲波逐件拎嚟玩。小朋友嘅專注力的確係好有限~.~


結果當然係要大人來埋尾啦!辛苦晒喇!晴朗爸爸~ ^^'''


好在又唔曳得晒!對於司儀所問嘅問題都應對自如,證明有聽書呀!XD


作品終於完成喇!大家估到係咩嘢動物未呢?


嚟番張大合照先~

一 二 三 四 五 .... 總共有五隻大熊貓呀!


唔多似?對於初學者嚟講,收貨啦!XD

今次活動好有意義呀!除可學習有趣嘅扭氣球技巧,仲對SEN學生嘅潛能了解多咗添!SEN學生可能學習同行為上會同一般小朋友有啲唔同,但只要透過學習和指導,抱持住永不放棄嘅精神,一樣可以創出驕人嘅成績。計劃透過學習氣球藝術訓練SEN學生嘅專注力、手眼協調、自信心等。而且有接近30位恆生義工參與課堂培訓,協助班上SEN學生,確保佢哋可以完成每堂嘅目標。好有意思!希望一班SEN學生可以繼續保持住學習氣球藝術呢份自信,無懼未來人生中嘅各項挑戰。加油呀!

精華片段:

YM Balloon
地址:新界葵涌葵盛圍32-40號香港中華基督教青年會新界會所3樓YM Balloon辦公室
電話:2528 2938, 9122 1704
網址:http://ymballoon.ymca.org.hk
facebook:https://www.facebook.com/pg/ymballoon


FIND US on:
     

BLOGs:

CONTACT US: