科學實驗教室@愉景新城D・Park

每個小朋友都好奇心爆棚，對於新鮮事物總會充滿疑問和探索精神。我哋今次就嚟到愉景新城D・Park參加「科學實驗教室」，今堂將會探索「漩渦的力量」，小朋友已經預備好化身成為小小科學家喇！
呢位係Stephen Sir，佢會同我哋一齊揭開漩渦嘅秘密㗎！

知唔知呢個係咩嚟呢？唔係黑色紙箱咁簡單~

按壓紙箱，噴出嚟果股空氣好強勁！朗朗被噴得幾開心?XD

道具嘅名堂叫做「空氣炮」

小朋友都對「空氣炮」好有興趣呀！

距離咁遠都能夠噴郁個黑色膠袋，係咪好勁呢？

Stephen Sir示範加啲煙落去空氣炮裏面，咁就可以清楚見到噴出嚟嘅空氣成一個donut形，呢個就叫做「漩渦環」。好得意呀！

朗朗都好想親身體驗下喎！

Stephen Sir教我哋整一個迷你嘅空氣炮，咁咪每個小朋友都可以體驗一下囉！

材料需要一隻紙杯

響紙杯底部畫上喜歡嘅形狀

然後用cutter切去形狀

杯頂要用保鮮紙包好，然後用膠紙將保鮮紙貼實隻杯

迷你空氣炮完成喇！

注啲煙入去空氣炮內

試下射程有幾遠先~

個個小朋友都好努力嘗試喎！

方形又有，三角形亦有，不過原來唔同形狀係唔會影響漩渦環嘅donut形㗎！

呢幅睇得清楚啲，雖然個杯cut咗方形，但噴出嚟嘅煙一樣係donut形

繼續努力嘗試，玩得好開心呀！

成班同學仔都好認真學習喎！

Stephen Sir將紙杯放響空氣炮上，叫我哋估下按壓空氣炮後，隻杯會飛起定會被吸入空氣炮內？

個個都好踴躍搶答，答案係會飛咗出嚟㗎！XD

用紙巾取代紙杯，結果都係一樣喎！

咁如果將張紙巾蓋住半個炮口呢？

結果紙巾被吸咗入去空氣炮內

又試下用空氣炮向紙杯發射~

中！空氣炮嘅力量真係唔講得少呀！

做完漩渦力嘅實驗，接住落嚟！會探索一下壓力~

原來空氣係可以伸縮同壓扁㗎！我哋去試驗下囉！

夾住針筒嘅出氣口，嘗試將針筒內嘅空氣壓扁

加啲發泡膠粒又試下丫！

再嚟試下用棉花糖做測試

每當壓落去嘅時候，粒棉花糖被空氣壓到好似委縮咗咁呀！

轉用海綿又試下先~ 點解冇變化嘅？

吸啲水再試下~

水又壓唔壓得到嘅呢？

用熱水又會有咩分別？

將針筒拉後嘅時候，會產生咗啲氣泡呀！點解嘅？原來壓力可以加強氣化，而溫度高(熱水)更加加快咗氣化嘅速度

Stephen Sir叫我哋試下揼脹個樽

然後揭開樽蓋，樽裏面嘅液體(酒精)就會變成氣體喇！

我哋又試試先~ 揼揼揼....努力將水樽揼到脹卜卜

然後一揭開蓋，液體真係變成咗氣體。呢個測試係模擬咗雲係點樣形成。由於地面嘅壓力大過天空，將樽內嘅壓力加大，揼脹嘅時候就等於地面嘅壓力。一打開蓋，壓力細咗，等於水升上天變成雲。在場小朋友都覺得好神奇呀！

又係考考大家嘅時間，點樣可以將上面個樽啲水流落去下面個樽呢？

小朋友都一致覺得用力揸上面個水樽咪得囉！但呢個方法好慢，而且要不停按壓水樽，好嘥氣力。Stephen Sir有更好方法呀！佢用手大力打圈，漩渦力令到啲水好快咁流向下面個樽。係喎！用番漩渦力咪得囉！

個個小朋友都好想親身體驗下，但由於時間關係，送咗一人一set實驗道具番去玩下啦！套裝除咗包括啱啱講嘅漩渦力實驗之外，仲有噴泉實驗同埋自製簡單溫度計。正喎！可以番屋企慢慢做測試喇！

臨走唔好忘記響多元智能學習樂園passport上吸番今次個印章喎！

落堂喇！今堂學嘅嘢真係令我哋大開眼界呀！

今堂學咗兩個主題：(1) 漩渦力，用空氣炮噴射donut形狀嘅漩渦環出嚟；(2) 壓力，在加咗壓力之下，液體會變成氣體。除咗加熱(如煲水)外，原來加壓力都可以將水變成蒸氣㗎！天空上嘅雲就係類似咁嘅情況形成，當壓力改變，地面嘅水就會變成天上嘅雲喇！小朋友都覺得好奇妙，亦玩得好投入。而我就覺得好似番咗去中學理科堂咁，真係獲益良多呀！希望朗朗繼續用呢份求知精神，去探索奇妙的世界啦！嚟梗一課會帶大家揭秘「改變溫度的奧妙」，有興趣嘅朋友就唔好錯過喇！資料如下(可按圖放大)：

愉景新城 D・Park
地址：荃灣青山公路398號愉景新城
網址：http://www.dpark.com.hk