金坊泰國美食

好想食泰國菜呀！但係去邊度食可以平靚正呢？朋友帶咗我哋去荃灣一間樓上舖唔只食物美味，仲比一般泰國餐廳價錢平啲添！一齊去睇真啲喇喂！
就係呢度喇！餐廳位於3樓~

地面有接待員帶我哋搭lift上餐廳，直lift上好快到！

到達餐廳喇！門前擺放咗好多各式各樣嘅泰式擺設

有唔同嘅佛像，好莊嚴咁呀！

晴朗對於每樣擺設都感到好好奇~

等梗嘢食期間係最期待㗎！我哋已經好肚餓喇！~

先來飲品，椰青好清甜，係朗朗嘅至愛呀！

芒果沙冰 - 好涼快，啱晒行到熱辣辣嘅我解渴啦！

生蝦 - 好耐未食過泰式生蝦，堅正呀！蝦身肥美厚肉又彈牙，好新鮮。配埋佢哋嘅秘製醬汁，酸甜得嚟帶點辣，好開胃~ 好快清晒，要嚟多round呀！

青木瓜絲沙律 - 啲木瓜絲吸晒汁料嘅精華，味道甜甜酸酸咁，仲帶啲辣。材料夠爽，又係開胃之選~

雜錦拼盤 - 小食拼盤包括咗蝦餅、魚餅、春卷、香葉包雞，啱晒想試唔同小食嘅我哋喇！當中最鍾意係炸蝦餅，炸得鬆脆得嚟，粉漿又唔會太厚，蝦肉爽口彈牙，啖啖肉。點埋甜酸醬一齊食，滋味十足！

沙嗲串燒 - 炭燒香味陣陣撲鼻，燒得金黃微焦。牛肉唔韌燒得啱啱好，雞肉夠軟滑，豬肉唔實好好味！每串份量都幾大，點埋香濃花生醬味嘅醬汁，間直係抵食夾大件呀！

海南雞 - 估唔到呢味反而係小朋友最喜愛嘅一款，不過整得真係唔錯！肉質嫩滑味美，食完一件又一件，畀小朋友送飯唔怕食唔飽啦！

泰式豬手 － 煮得好淋呀！嗦晒湯汁，好入味。一碟唔夠分，我哋叫咗兩碟先夠喉呀！

菠蘿海鮮炒飯 － 好足料，味道調較得啱啱好，不過如果有埋原個菠蘿上就更加正喇！

泰式青咖喱雞 - 我嘅至愛呀！雞肉煮得嫩滑，青咖喱清清地唔太辣帶點椰香味。正！

印度薄餅 - 我哋冇叫白飯，叫咗薄餅點咖喱食，好夾好好味！

蒜蓉包條 - 呢個係必點之選！成條包烤到金黃色外脆內軟，牛油同蒜香味十足，就咁食或者點咖喱一樣咁好味。冇得輸！

冬陰公明爐烏頭 - 仲記得細細個同家人去食泰國菜一定會叫烏頭魚，每次食都會回味番以前嘅童年回憶。又可以食番童年嘅味道，飲埋煮魚果啲湯仲正呀！

香港舖租貴就係人都知㗎啦！餐廳開響樓上，成本少咗，價錢自然都平啲。呢度環境寬敞舒適，周圍佈滿唔同嘅泰國裝飾，好有泰國風味。不過食物平靚正先至係重點。睇我哋叫到成枱都係就知朋友冇介紹錯喇！一行人6大6小，價錢都係$281/大人咋！真抵食！有機會都想再嚟食過呀！

 金 坊 泰 國 美 食 
地址：荃灣兆和街38-40號荃灣美食城3樓全層
電話：2744 4366