2017年1月19日 星期四

茶粿製作x棚屋導賞x曬咸蛋@大澳文化生態綜合資源中心

位於大嶼山嘅大澳,有香港威尼斯之稱。一有時間,我就會入去行下㗎喇!好鍾意呢度嘅環境同美食。不過今次嚟大澳唔只行同食咁簡單,仲會去女青嘅大澳文化生態綜合資源中心深入了解大澳嘅人和事同埋傳統食品製作。好期待呀!
由荃灣開車,70分鐘嘅車程,終於到達大澳喇!


中心職員好好,已經出定嚟車站接我哋落旅遊巴,仲溫馨提示洗手間位置,待各人都放低幾両後,就開始講解喇!^o^


第一個活動係學整茶粿,一行27人向前進發!gogogo~


嚟到一間店舖 -「隱姑茶粿」嘅廚房,見到一個只會響電視古裝片先睇到嘅爐灶,好似番咗去古代咁呀!XD


大家知唔知茶粿係點整㗎?原來外層係糯米粉加熱水搓成粉糰~


饀料方面,有甜味嘅花生、豆沙,同埋咸味嘅眉豆。而呢盤係花生饀料嚟呀!


蒸籠同埋荷葉都準備好,可以開始整喇!


先同大家介紹呢位李太姨姨,係整茶粿嘅熟手師傅。請多多指教!^^


首先兩隻手都撲上糯米粉,咁樣一陣間攞住個粉糰嘅時候就冇咁黐手喇!


然後攞一小糰糯米粉糰~


將粉糰壓扁~


加入花生饀~


包好饀料,再搓成圓扁形~


放埋響荷葉上面就完成!


可以加幾粒花生以作識別,攞得去蒸囉!~


火光熊熊,蒸5分鐘就食得喇!


響呢個時間,職員哥哥帶我哋到附近嘅地方等待茶粿蒸起,順便介紹一下大澳嘅事畀我哋知~


大人聽講解,小朋友就不停食零食~ XD

大家知唔知道大澳點解會叫做「大澳」呢?有關名字由來,眾說紛紜。第一個講法係個「澳」字代表可以泊船嘅地方,而呢度係容納最多漁船嘅地方,所以就叫做「大澳」。第二個講法係以前大澳對開嘅海域比較多一種魚叫做「大澳魚」,學名「黃唇魚」,所以就以呢種魚嘅名嚟命名大澳喇!


由於時間關係,李太已經幫我哋將茶粿入梗袋喇!


攞完茶粿就馬上開展下一個活動 - 棚屋導賞


職員哥哥帶梗我哋去「沙仔面觀景台」~


通過木板搭成嘅小橋就到㗎喇!


四周圍都係棚屋、小船同水道,水鄉風味好濃厚呀!


響觀景台可以望到好靚嘅大澳風光~


盡是湖光山色~


小朋友們都趁機欣賞一番,有啲四圍參觀,有啲就當咗呢度係遊樂場咁到處跑。有小朋友嘅地方邊度可以靜下來丫!^^'''


職員哥哥繼續為我哋介紹大澳,佢都幾風趣幽默,大家都聽得哈哈大笑~ XD


原來部份棚屋嘅外牆係用鋅鐵所造,外層再油一層油作保護。大家好自然嘅反應係會敲下佢,但要忍下手,因為裡面真係有人住梗㗎!殊~


棚屋底部所用嘅木叫做「坤甸木」,呢種木材有個特點,就係製作過程中會釋出油份。當木材要長期浸水嘅時候,油份就變成咗一層保護膜喇!可以用到成50年㗎!


小朋友越玩越hyper,大家似乎都好喜歡呢度呀!


咁多人一齊入大澳都係第一次,梗係要嚟番張合照啦!yeah!!!


下一站:大澳文化生態綜合資源中心


職員哥哥攞咗坤甸木出嚟畀我哋細看~


小朋友可以親手摸下木材嘅質地,又上咗一課~


木材表面較深色嘅紋理就係油份嚟喇!


大家都傳閱得好開心喎!^o^


嚟到中心,順便四圍參觀下啦!呢度介紹咗好多有關大澳嘅資料,原來大澳已經有超過百五年歷史㗎喇!


大澳水上新娘所穿著嘅傳統服裝~


棚屋模型,整得好靚呀!


一座座小棚屋,維肖維妙~


我哋隔離果部係大澳居民自製嘅衣車,衣車都可以自製,好犀利!


用鰽白魚魚頭骨整嘅天然傳統手工藝,技術超凡~


介紹得差唔多,係時候開飯囉!


未食飯先食茶粿,自己親手整嘅梗係特別好味啦!


餸菜陸逐上枱, 每道菜都煮得好有地道風味。尤其係炸墨魚餅,食得出係自家手打㗎!


仲有兩味都超正!一味係蝦醬蒸豬腩肉,呢個部位啲肉特別香口、柔軟口感正。而且切得夠簿,好入味。配埋大澳蝦醬,簡直係冇得輸!*o*


另一味係咸魚蒸肉餅,大澳啲咸魚真係特別梅香。知唔知點解丫?因為大澳人劏咸魚有一門秘技。一般人會在魚肚劏開,然後取出內臟。而大澳人係冇劏肚,直接響魚鰓位置一次過抽晒啲內臟出嚟!咁樣先夠原汁原味,我哋試過可以證明係真·好味!

不得了喇!今餐真係狂添飯。冇扼你㗎!一窩飯清晒,又再叫多一窩。我同晴朗爸爸夾埋共食咗7~8碗,未試過咁添飯法。大滿足!^o^


8餸+兩大窩飯+汽水/豆花,埋單$1000正。抵食抵食!餸菜好味之餘,老闆又熱情招待,真係very good呀!今時今日咁嘅服務態度就啱喇!^^ (lunch@威尼斯海鮮酒家)


如果冇行過大澳橋又點稱得上嚟過大澳呀?


整番張橋上全家幅先!每年都影一張,唔知可以影到佢哋幾多歲呢?XD


職員哥哥又嚟接我哋去下一個活動喇!沿途小朋友有問必答,呢位導遊真不錯!


經過一間小店,發現屋簷下嘅毛筆藝術。平日唔察覺,原來大澳都收埋咗好多藝術家~


太平車?係咩嘢嚟呀?


原來係擺放輪椅嘅櫃,方便老人家或有需要人士隨時借用。女青在大澳擺放咗十六個輪椅櫃,好貼心呢~


新基橋係居民自資興建嘅,已經超過30年歷史,目的為方便漁民出入棚屋區域~


橋嘅中間(黃線部份)可以打開畀啲大船駛過㗎!


由橋望出去嘅大澳風景實在太靚喇!咁啱有隻白鷺飛過,為整幅相片增添多一點大自然風味~ XD


響度仲可以望番過去沙仔面觀景台添!


好喇!嚟到最後一個活動 - 學曬咸蛋


職員哥哥唔係齋講㗎!不時會向小朋友發問問題,睇下佢哋幾踴躍搶答,但係冇獎品㗎喎!XD


曬咸蛋當然要用咸蛋啦!但係大家又知唔知呢啲係咩嘢蛋嚟呢?賣個關子先,陣間開估~^^


竹筏同埋漁網係用具之一,知唔知點解要將漁網放響竹筏上面呢?其實咁樣可以成為一個保護層,令蛋黃冇咁易畀下面啲粗鹽篤爛。而且用曬完咸蛋嘅漁網拎去蒸完再去用作捕魚,魚穫會更豐富。因為漁網上剩低咗一啲蛋白,會吸引多啲魚游埋嚟㗎!真係一舉兩得。竹筏都有一個特別嘅名,叫做「鍋欄」。又塞錢入大家個袋喇!XD


呢位萍姨將會教我哋點樣曬咸蛋,請多多指教!^^


首先將咸蛋剝殼,取出蛋黃~


攞個蛋黃去沖一沖水~


放在漁網上~


再灑少少鹽~


步驟完成。係咪好簡單呢?^^


跟住輪到小朋友落手做,大家都好投入呀!


話咁快就搞掂晒,第一次整,都算唔錯啦!


之後就可以拎出去露天地方曬喇!萍姨話曬兩三日就ok!


由於時間關係,萍姨準備咗已經曬好嘅咸蛋。大家都好滿意呢份禮物呀!職員哥哥仲醒咗5個咸蛋煮法畀我哋添!
1. 咸蛋蒸肉餅
2. 將咸蛋切粒炒飯
3. 咸蛋+蝦乾+魚仔乾一齊蒸
4. 蝦膏+豬頸肉+咸蛋一齊炒 (邪惡之物)
5. 將咸蛋整成溶,用嚟煮黃金蝦

(開估!用嚟曬咸蛋嘅蛋係鴨蛋嚟呀!)


學完曬咸蛋之後,就係自由活動時間喇!其實大澳都有好多靚景位,靚人靚景,啲相都特別靚呀!


經過大澳餅店門外見人龍,好自然就會過去八卦下啦!XD


原來啲人排隊買新鮮出爐,熱辣辣嘅沙翁~


啱啱炸起,外脆內軟,誰可抵擋如此誘惑?


沾上糖粒,我實在忍唔住喇!我要一個丫唔該!^^


傳聞中新鮮熱辣嘅抵食大沙翁,堅好味!必食之選!


隔離嘅雜貨店門外放咗一大個木筒,啲浮萍種得好靚呀!不過小朋友似乎對浮萍下啲魚仲有興趣喎!


附近仲種咗好多唔同嘅植物,種得咁好一定花咗唔少心機,佩服佩服!


臨走當然要買番啲手信回家啦!除咗蝦醬、咸魚同花膠之外,我哋今次買咗啲海龍、海馬,打算用嚟煲湯幫晴晴治久未治癒嘅咳咳呀!


小朋友嘅世界唔係玩就係食㗎啦!粒魚蛋仲大過佢哋個口喎!XD


離開大澳之前,把握時間繼續欣賞大澳風光~


小朋友就繼續玩,你追我逐,已經進入咗忘我境界喇!XD


快樂嘅時間過得特別快,又係時候講拜拜。大家都帶着愉快嘅心情回家去囉!^^V


食材當然要趁新鮮食用啦!番到屋企,我哋用咗啲咸蛋嚟蒸肉餅,好好味,下次入去要買多啲做手信先得!*o*

在大澳,無論小檔、店舖以至餐廳,都好感受到果份濃郁嘅人情味。酒家用心煮嘅餸菜,更令我哋一試難忘。呢度簡撲嘅生活、鄰里之間友好嘅關係、風景怡人嘅環境,大概就係我常來嘅原因。好多謝職員哥哥為我哋講解咗咁多一直冇留意到嘅大澳人和事,原來佢係土生土長嘅大澳原居民嚟!唔怪之得資料咁齊全啦!好滿意今次嘅旅程呀!大家如果有興趣去玩嘅話,都可以好似我哋咁自己組團報名。中心仲有好多其他活動,每項活動都設有最少參與人數,大概都需要有20人,最多60人。係一次好好嘅大澳生活體驗,亦對大澳文化了解咗好多。玩足一日都未必夠喉,認真樂而忘返。值得推介呀!

你或者會有興趣睇埋我哋上次嘅大嶼山自駕遊:
http://blog.xuite.net/chinglongtin/blog/464561187


香港基督教女青年會 · 大澳文化生態綜合資源中心
地址:大嶼山大澳永安街61至63號地下
電話:29856310
網址:http://cerc.ywca.org.hk/