2017年1月11日 星期三

花花世界兒童樂園 + 花田韓式燒烤場

突然挑起條癮想去BBQ添!但係帶住小朋友要搵合適嘅地方唔係咁容易。早前見天水圍開咗一個地方有嘢畀小朋友玩,玩完又可以燒埋嘢食。好似好吸引喎!一於向北走走,深入探索一下呢個親子場地係咪咁正先!大家跟貼啲,跟住嚟啦! 
「花花世界兒童樂園」,係呢度喇! 去玩囉!去玩囉!


嘩!超級無敵大彈床呀!小朋友雙眼即時發晒光!*o*


展開任跳任瀡任撞旅程喇!are you READY???


彈床真係好大,設有唔同嘅障礙物,不過點撞都唔怕啦!即管去馬~ gogogo~~


小朋友們二話不說已經上晒去三連滑梯度喇!


朗朗同啲同學瀡得勁high,情緒十分之高漲呀!XD


來來回回不停咁瀡,小朋友真係精力無界限~


到處跑,到處跳,你追我逐~


追我唔到嘅!繼續跑呀!~


晴晴未夠膽瀡大滑梯,唔緊要!瀡住個細嘅先啦!


一樣玩得咁開心!


遇到熊貓family,同佢哋say個Hello先!熊貓bb好得意呀!


玩到索晒氣,挨住熊bear bear抖下先~ 其實媽媽都追到氣咳喇!@@'''


椰林樹影,環境幾咁優美~


繼續jump..jump...jump....


捐癃捐隙我至叻!^o^


咦!遠處嘅大笨象似乎仲好玩喎!去囉!去囉!


朗朗已經急不及待爬梗上去喇!


上到去望番落嚟原來咁高㗎?我可唔可以放棄呀?XD


朗朗你自己瀡啦!We~~~


好玩呀!跟住就係不停地encore~ 媽媽都係坐埋一邊抖抖先喇!XD


從高空望落去張超級無敵大彈床度,果真大!夠晒地方畀小朋友跑跑跳跳,唔怪之得佢哋玩到唔捨得離開~ ^^'''


喪跳完彈床跟住玩咩好呀?wahaa~


過嚟玩電動車啦!咁大個場,正呀!


晴晴揀咗部綠色嘅吉普車,揸住佢去越野囉!


朗朗呢架卡奇色都好型仔喎!踩油門,去呀!


玩完一圈,晴晴覺得吉普車速度太快,換咗架millions小綿羊,好cute呀!呢架仲襯女孩子啦!不過真係好...慢.......^^'''


車道闊落,響呢度駕駛難度唔會好高,不過唔知點解分隔車道啲柱好多都畀人撞爛晒...@@''' 因為個個都無牌駕駛?XD


另一邊廂,同學仔去咗打wargame~ ACTION!!!


埋伏、換彈、研究對策、出擊!玩得不亦樂乎~


玩完車車,不如去玩下攤位遊戲囉!睇下有咩玩先~


玩得好投入喎!咩嚟㗎?


原來係挖掘機,要挖到指定數目嘅波波先攞到獎㗎!


玩埋隔離部彈波子機先~


不如去釣魚囉!


又一條!釣咗好多魚呀!大滿足!


掉爛晒你啲大板牙先!我hey~


呢度啲職員好好,無論玩邊個攤位,玩完總會有啲小獎品畀番小朋友。不論大小,小朋友收到一樣咁開心!


考下眼界先~ FIRE!


玩完又可以揀禮物喇!有咁多選擇會唔會好難揀呀?@@


嘩!四驅車喎!呢份係最大份嘅獎品嚟呀! *o*


仲有好多其他攤位,我哋都玩唔晒咁多~


除咗攤位遊戲之外,仲有一啲做小手工嘅counter,都幾受小朋友歡迎㗎!


口淡淡,可以到小食部買啲嘢食過口癮~


仲有玩具賣添!好大隻比卡超呀!*o*


五臟廟鐘聲響起,係時候到隔離嘅花田韓式燒烤度醫醫肚喇!


小屋、高櫈、魚塘、噴水池...環境唔錯喎!


我哋即將會響呢度bbq喇!地方係咪好正呢?


對住條河bbq,環境優美,心情特別舒暢~


肚子咕咕聲,快啲去攞食物先。小朋友見到啲山羊「咩咩」叫咁周圍問人攞嘢食,好興奮呀!


韓式頭盤包括牛柳粒、羊架、豬串骨、三文魚鰭,四選一。既然我哋有7張券,就試晒咁多款啦!呵呵!^o^


仲有其他食物可以任揀任食㗎!


職員教我哋放張紙上去個爐度,然後放食物上去燒,咁啲食物就冇咁容易燶㗎喇!


開爐成功!yeah!!! 燒食物就靠晒你喇!晴朗爸爸~ XD


韓燒有個好處,好快又燒好一碟食物,大家都唔駛再餓住等囉!hohohoo~


小鴨子聞到香味都要來湊下熱鬧呀!


大人同小朋友都開餐lu喂!食得好開心!


晴晴啱啱先小病康復,bbq食物唔係咁啱食,過士多睇下有咩賣先~


來一客合味道,食到「殊殊」聲~


一邊嘆美食,一邊欣賞湖光山色,實在太美妙喇!^^


小朋友食飽就梗係再玩過啦!追追逐逐,夠晒熱鬧!


食到飽飽哋,不如整番碗糖水囉!


腐竹薏米糖水都幾多料喎!如果有埋原隻雞蛋就perfect喇!


嘩!流星呀!快啲許番個願望啦!*o*


晴朗正欣賞夜景,原來呢度嘅夜景都好靚㗎!


遠望對面都係燒烤場範圍,地方好大~


小山羊見我哋玩得咁開心,都要嚟玩埋一份呀!


朋友帶來嘅電動滑板車好好玩,增添咗不少歡樂氣氛~


班小朋友玩樂到尾聲依然keep住hyper,真係佩服得五體投地喇!^^'''

好攰好攰!好耐未試過由朝玩到晚喇!響超級無敵大彈床度追啲細路追度我氣咳,雖然好攰,但玩得好開心呀!其實花花同花田係兩間唔同嘅店嚟!花花提供彈床、電動車、wargame、攤位遊戲等親子活動,而花田就提供韓式同港式燒烤。如果大家好似我哋咁貪心,想一次過滿足晒玩同食嘅慾望的話,去到花花入場嘅時候直接購買套票便可。詳情如下:

玩樂 + 韓燒
星期六、日、假日及假日前夕,任玩2小時跳彈床滑梯、動力車及1次wargame+4小時韓式燒烤
2位成人+1位小童(120cm或以上) $538
1位成人+1位小童(120cm或以上) $388
購買上述套票後如有需要,可加購以下優惠:
- 額外每位小童(120cm或以上) $248
- 額外每位成人 $168
- 120cm以下的小童無須付燒烤費,只需購買遊戲手帶$144/位

玩樂 + 港燒
星期六、日、假日及假日前夕,任玩2小時跳彈床滑梯、動力車及1次wargame+4小時港式燒烤
2位成人+1位小童(120cm或以上) $488
1位成人+1位小童(120cm或以上) $358
購買上述套餐後如有需要,可加購以下優惠:
- 額外每位小童(120cm或以上) $218
- 額外每位成人 $138
- 120cm以下的小童無須付燒烤費,只需購買遊戲手帶$144/位

* 以上2小時任玩 + 4小時BBQ優惠套票需最少購買2大1小或1大1小優惠套票1套,才可以優惠價加購額外成人、小童或120cm以下之小童遊戲手帶優惠
* 如家庭當中沒有120cm或以上小童,不適合使用優惠套票。可先到花田購買燒烤券,然後到花花出示燒烤券可享9折購買入場券優惠:

- 花花2小時任玩彈床滑梯、動力車及1次wargame:每位小童正價$160,9折後$144
- 花花全日任玩彈床滑梯、動力車及wargame:每位小童正價$280,9折後$252

以上套票費用未包括攤位遊戲及其他設施收費,如果想玩埋就要另外畀錢喇!我哋揀韓燒嘅原因係快靚正,快快燒起啲食物就可以招呼啲細路,大人又唔駛捱肚餓,一舉兩得!最欣賞係頭盤嘅三文魚鰭,燒到啲魚油出晒嚟!好香好好味!而雞扒塊皮燒到脆卜卜,牛扒肉質都唔錯呀!大家好快就已經食到飽一飽。有幾點要留意嘅係,由於燒烤場冇吸手印記認,出入最好袋住張bbq券以備職員檢查。仲有呀!如果坐響河邊嘅話,要小心隨身物品誤落水中。晴朗媽媽摷袋嘅時候聽到「dum」一聲先發覺跌咗啲嘢落水。經檢查後,好彩只係一個唔值錢嘅「尿袋」。如果係銀包或者電話就大件事喇!哈哈!大家要注意喇!呢度有得畀小朋友放電,又可以畀大人過下bbq癮,真係一個唔錯嘅好地方。有機會都想再encore呀!


 花花世界兒童樂園 
地址:天水圍天慈路馮家圍30號B
電話:申請中
facebook:https://www.facebook.com/flowerplayground

 花田韓式燒烤場 
地址:香港元朗天水圍馮家圍30號
電話:9227 0728
網址:http://www.floralandbbq.com
facebook:https://www.facebook.com/Flowerbbq