香蕉船

香蕉變出香蕉船，船上面有一排歡笑面....。相信大家都應該聽過呢首歌㗎啦！未聽過？唔好扮細喎！我哋今次就將香蕉變出香蕉船啦！預備好未？嚟㗎喇喎！
材料就係咁多，好簡單！香蕉、三色雪糕、烘焙用朱古力、裝飾朱古力粒粒。好！開始喇！

1. 先將香蕉去皮

我比較鍾意七、八成熟嘅香蕉，如果你鍾意生啲嘅都冇問題，按各人喜好啦！

2. 香蕉切半，放在碟嘅兩旁

3. 將烘焙用朱古力放響容器內，預備加熱

4. 水滾熄火，成兜朱古力放落水，不停攪拌直至變晒朱古力漿為止 (可以keep住放響度，用嘅時候先拎起，咁就唔怕朱古力響室溫下又凝固番喇)

5. 預備雪糕球

唔同顏色嘅雪糕球會更加刺激食慾，小朋友見到就更加開心啦！

跟住落嚟，就要預備加裝飾喇！我哋買呢隻一樽有4款口味，朱古力針、銀珠....

七彩粒粒同埋七彩針，響大間啲嘅超市或者烘焙店就買得到㗎喇！

6. 加上裝飾

7. 加上朱古力漿

8. 晴朗版本嘅香蕉船搞掂喇！woo~ ho~~~

如果大家唔鍾意咁花巧，簡簡單單雪糕+香蕉都得㗎！

想靜係加少少裝飾又得！

好似我哋朱古力狂熱份子咁樣，勁加朱古力漿亦得！晴朗媽媽版本香蕉船就係咁，得咗！

我哋唔客氣喇！~~~~
想得出嘅配料都可以加埋落去，例如威化餅、Oreo餅乾、花生碎....，整出嚟一定仲豐富呀！好簡單，在家就可以變出獨一無二至啱你心水嘅香蕉船，係咪好開心呢？一定好味過市面售賣果啲，仲等咩呀？快啲去買材料同小朋友一齊親子玩下啦！