【宜蘭親子遊】A‧maze兔子迷宮咖啡餐廳

每次去旅行都好鍾意響行程安排一啲觀景嘅景點，欣賞景色之餘，又可以回味一下旅遊點滴。聽講有間主打睇風景嘅餐廳可以睇晒成個蘭陽平原嘅景色，無論日景定夜景都一樣咁靚！感覺上，夜景應該會多一份浪漫美，一於安排晚餐去睇下囉！
兔子迷宮係一間位於山上嘅餐廳，招牌上果隻鬼鬼祟祟嘅兔仔，就好似想帶我哋入去佢嘅世界一樣，好有神秘感~

又去新地方玩，晴朗梗開心啦！已經急急腳唔等我喇！^^'''

晴晴見到餐廳門外兩隻大bear bear超興奮，仲同佢哋一齊打韆鞦添呀！

入到餐廳內，第一件事就係被大大塊黑板吸引住，即管盡情發揮無限創意啦！

餐廳裝修簡潔舒適，在昏暗嘅燈光之下，舒服到有啲想眠一眠...zZzz..

開心大發現！原來餐廳名乎其實，真係有兔仔㗎！

餐廳內仲設有一個打晒燈嘅攝影角落，好專業喎！唔只可以同bear bear玩，仲可以大玩自拍添！

鮮黃色嘅餐廳外牆上，又見到鬼祟兔嘅蹤影喇！

戶外座位可以望到廣闊嘅視野，超正！

嘩！幾乎可以睇晒宜蘭所有城鄉！呢度嘅夜景真係好靚呀！*o*

據聞日頭嚟到，仲可以清楚見到龜山島同埋太平洋添㗎！

燈光閃閃嘅小路，瀰漫住浪漫氣氛，情侶拍拖漫步就啱晒啦！

沿住小路一直往前走，來到心心相印嘅地方。好靚呀！

漫步穿過愛心，再步入小教堂，成件事變得好幸福！唔知有冇人試過響度求婚呢？XD

再行過啲，有一個類似雀籠嘅得意地方~

唔駛解釋，晴朗已經自動波玩梗搖搖馬，第二樣嘢又唔見咁醒喎！XD

原來唔係搖搖馬，全部都係搖搖兔嚟呀！rabbit~ rabbit~~

晴晴係咁叫我過去睇！原來上去高台觀賞嘅風景仲靚！好叻豬喎！

餐廳地方十分大，如果日頭嚟，坐響露天茶座嘆住咖啡，望住怡人景色，你話幾咁寫意呢？

晴朗見到兒童遊樂場，就好似發現新大陸咁，雙眼發晒光！*o*

木製嘅遊戲屋，同呢度嘅環境好襯呀！朗朗已經爬梗上去樹屋度感受下喇！

跟住兩個就來來回回，不停瀡滑梯！咁好精力，真係要寫個「服」字畀佢哋~ ^^'''

你高啲定我高啲？打韆鞦打得好開心！仲越打越hyper添呀！^o^

不過食物已經陸逐上枱，係時候要洗手食嘢喇！啲嘢食好豐富！同大家介紹下先！^^

綜合炸物拼盤 - 全部都係啱啱炸起熱辣辣，小朋友當然至愛薯條啦！而我就鍾意麥樂雞同洋蔥圈。好有美國風味！

蔥醬海鮮義大利麵 - 意粉煮得夠煙韌，個汁唔係一般白汁或者茄汁，而係秘製蔥汁。我覺得更加可以帶出海鮮嘅鮮味，好特別呀！

燻雞奶油燉飯 - 雞炸得皮脆肉滑，點埋醬汁仲好味！密密食，熱氣都唔理喇！XD

台式麻油雞 - 麻油味好濃郁，雞肉又嫩滑，配埋宜蘭米煮成嘅白飯。好完美！仲跟咗沙律、配菜、炸魚同埋奶凍，太豐富了吧！*o*

香酥德式豬腳 - 豬腳炸得香脆可口，啖啖肉，點埋甜甜哋嘅醬汁，好味呀！南瓜湯煮得好creamy，啱晒我口味！可惜食到呢個moment，戰鬥力已經十分薄弱。又要靠包車司機包底喇！加油！XD

好豐富嘅一頓晚餐，全部食物都好滿意呀！飽~~

就算飽到極點，都唔會放過甜品。呢啲就係女士們嘅專利喇！^^

食飽出外走走，又遇到開心大發現！

我冇睇錯丫嘛？養兔仔嘅籠大過我哋屋企間房呀！仲有小屋同滑梯畀佢哋玩，居住環境超理想~

晴晴好受兔仔歡迎，啲兔仔實在太可愛喇！

話明兔子迷宮，當然要感受一下佢哋嘅迷宮啦！

哎吔！掘頭路行唔到，迷失咗方向，點算好？

東走走，西走走，終於搵得到出口！成功囉！呵呵~

原來兔子迷宮堅係有兔仔同迷宮㗎！好驚喜！餐廳以前係一間戶外幼稚園，改建之後，就變成景觀咖啡屋喇！呢度地方大，寬闊又舒適，仲有大草地可以畀小朋友亂跑添！除咗可以飽覽蘭陽平原嘅浪漫美景之外，仲可以數下星星。原來晚上亮起燈光嘅宜蘭係咁靚，當晚所見到嘅夜景，好深刻，好難忘。如果香港都有呢啲欣賞夜景嘅咖啡店，你話幾好呢？餐廳啲嘢食同飲品都整得好好味，服務亦都唔錯。無論三五知己上嚟飲嘢傾計，定係情侶拍拖撐枱腳，都一樣咁啱feel，仲可能會坐足成晚添呀！咁正，唔怪之得咁多人嚟幫襯啦！全晚消費合共$2140台幣，即大約$571港紙，又玩又食仲有靚景。簡直係超值呀！

A‧maze兔子迷宮咖啡餐廳
地址：宜蘭縣員山鄉枕山一村15號
電話：03-922-9575
facebook: https://www.facebook.com/maze3399
營業時間：星期日~四 11:00~23:00；星期五~六 11:00~24:00

---

FIND US on:
     

BLOGs:

CONTACT US: