2017年4月8日 星期六

【精彩喜劇】韓國《拌飯秀 Delicious Musical BIBAP》@澳門巴黎人

韓國最出名係咩丫?泡菜?炸雞?nono...唔好成日掛住食啦!其實韓國嘅表演秀都好出名。好似亂打秀、功夫秀、結婚秀...都非常受歡迎!想睇秀,唔一定要飛去韓國嘅!熱切期待嘅《拌飯秀》已經登陸澳門,搭船就可以喇!據聞《拌飯秀》係世界上最美味嘅表演,胃食嘅我哋又點會錯過呀!
到達表演場地 - 澳門巴黎人劇場,心情已經十分興奮期待喇!


首先出場嘅係兩位oppa,佢哋以beat box口技奏出唔同嘅節拍聲,技術高超,唔知仲以為係樂器演奏梗添呀!


一眾《拌飯秀》演員到台上載歌載舞,原來佢哋唔只口技了得,唱歌跳舞都好得!


整意大利pizza呢幕都有幾個搞笑位,有個廚師整整下切親隻手呀!wa~~ @.@


佢哋仲會大玩拋麵粉,百發百中,永冇失手~


話咁快pizza已經新鮮出爐喇!又開始載歌載舞~


演員仲會到台下邀請觀眾上台參與,同觀眾互動一番,睇住在台上嘅觀眾不知所措嘅樣子都已經好好笑喇!XD


主廚大獻廚藝嘅時候,所有切菜聲、炒菜聲、煎炸聲同洗碗聲等都係由演員用口技模仿出嚟㗎!


主廚扮演慢動作煮嘢呢幕好逼真,又係好好笑,簡直係七情上面呀!


大大碗麵好快就煮起喇!


又到邀請現場觀眾上台嘅環節,識睇一定係睇觀眾在台上嘅表現,不過小心笑到甩牙骹喎!XD


另一part beat box口技表演,如果閉上雙眼,真係唔會估到係人聲演出嚟呀!仿真度極高!


曬肌肉時間,Oppa!!!


仲要大玩b-boy街舞同體操,型爆呀!*o*


最後一場歌舞夾雜著街舞同體操,好有活力,好精彩!


配合埋舞台燈光效果,成件事就更加完美喇!


表演完畢,全場掌聲不絕!演員咁用心演出,我都拍爛手掌呀!


最後,仲請咗《拌飯秀》嘅導演同埋演員出來同大家見面。不如聽下佢哋對《亂打秀》嘅親身解說啦!


一般在韓國嘅公開表演,都會諗起《亂打秀》,《亂打秀》係以敲擊樂器所演出而成。20代只聽過《亂打秀》,30代就只聽過beat box,而《拌飯秀》就係由《亂打秀》同埋beat box所結合而成。《拌飯秀》同其他秀最大嘅唔同係我哋比較注重將敲擊樂器同埋料理去製作出一個完美嘅演出。《拌飯秀》概念係由beat box, b-boy清唱嘅方式製作出唔同嘅料理,同埋到演出嘅最後,觀眾係可以上台品嘗我哋製作嘅拌飯,令觀眾感受到最真實嘅舞台,亦都係同一般嘅《亂打秀》最大嘅分別之處。


《拌飯秀》係由beat box, b-boy清唱同埋戲劇橋段所構成,以身體表演、敲擊樂器、武術等製作而成,觀眾可以睇到多樣化嘅場面。有啲完全冇接觸過演技嘅演員,在接受過十分艱難嘅演技訓練同埋經歷六年嘅演出後,演員間已經可以互相配合得好好,亦培養出十分熟練嘅演技。


其實十幾年前已經想用料理概念去製作舞台劇,因為啲人對於料理嘅關心度越來越高。關於料理嘅節目同埋電影越出越多,但係關於料理嘅舞台劇就唔多,所以我哋就以世界各地具有代表性嘅美食,例如日本嘅壽司、西方嘅pizza、中國嘅麵條同埋韓國嘅拌飯為主題,可以引起唔同國家觀眾嘅共鳴。為使觀眾同演員有充份嘅交流同接觸,特別安排在最後一幕邀請觀眾上台品嘗料理,再選出優勝者,從而將尷尬嘅氣氛轉變為歡笑氣氛。


到目前為止,《拌飯秀》出現過嘅城市大概有25至100個,包括亞洲、南美洲、歐洲等國家。其中南美洲嘅演出係最難忘,因為當地地形屬高山地帶,我哋要戴住氧氣筒、流住鼻血咁去演出,去到完場嘅時候所有觀眾都起晒身拍爛手掌,各個演員亦都感動到熱淚盈眶。


由於全世界對於料理嘅關心度都漸漸提高,《拌飯秀》以beat box, b-boy清唱形式將各個國家熟悉嘅代表食物製作過程表演出來,最後又會以觀眾選出優秀者呢個概念去表達,為觀眾帶來一種好新鮮嘅感覺。表演會以肢體動作去取代台詞,任何一個國家嘅觀眾都可以理解同埋產生共鳴。亦都因為加入咗多元化嘅表演元素,所以深受觀眾喜愛,並且成功吸引咗世界各國嘅關注。


《拌飯秀》真係一場既幽默又精彩嘅演出!好好睇呀!


表演者互相合作得天衣無縫,好有默契,相信就係演出成功嘅關鍵喇!

等我帶大家近距離睇下佢哋啲道具啦!






全部道具製作都好認真,一啲都唔馬虎。梗係啦!務求令每位觀眾都全情投入表演當中丫嘛!

講咗咁耐,不如馬上睇下《拌飯秀》嘅精彩片段先啦!

最後,唔好話我收埋收埋,送埋幕後花絮畀大家喇!

一眾演員都好nice,好搞笑呀!莫非佢哋天生就已經有呢種豐富嘅幽默感?XD

《拌飯秀》除咗有歌舞表演之外,仲會有廚師獻藝,真係一齣集韓國流行音樂、文化同美食於一身,好精彩嘅音樂喜劇嚟呀!唔識韓文都可以完全明白,而且全無冷場,仲好搞笑添!最欣賞嘅係佢哋超凡嘅beat box口技,而邀請現場觀眾上台參與環節又係好搞笑低死!睇完一場演技精湛、充滿活力嘅表演,好滿足呀!大家都快啲訂飛,一齊嚟到《拌飯秀》玩盡廚房,笑盡佢啦!

《 拌 飯 秀 》
日期:7/4/2017 ~ 23/4/2017
地點:澳門巴黎人劇場
票價:港幣/澳門幣$180~480
購票可登入 http://www.cotaiticketing.com 或致電 +853 28828818 (澳門) / +852 63336660 (香港) 訂購