2017年4月26日 星期三

【宜蘭親子遊】羅東鎮農會養生文化觀光工廠

「農會」係台灣特有嘅農民組織,主要負責製造及發售當地出產嘅農產品。響宜蘭,每個鄉鎮基本都會有一至兩個農會,全宜蘭約有三十個。今次嚟到羅東鎮嘅農會,除咗可以對宜蘭農業加深認識外,仲可以玩埋DIY。係一個唔錯嘅體驗嚟呀!
羅東觀光工廠分咗幾個部份,而我哋首先想做嘅係shopping呀!(最想果個係我~XD)


平埔族係早期宜蘭嘅原居民,「猴子」嘅平埔族話叫「羅董」。「羅東」鎮名嘅由來就係咁嚟㗎喇!所以響羅東好多舖頭招牌上都會掛有猴子嘅圖案。呢隻馬騮就係「羅董」喇!英文名「LOTON」。你好嘛?


店內貨品種類十分多,排列得整整齊齊。農會致力研發健康飲食,每一款都係優質食品~


「不如今晚攬住羅董瞓覺囉!」hehee~


宜蘭種植嘅稻米同日本珍珠米好似,但味道卻比珍珠米好味同飽肚。掃貨時間到喇!買呀!~


呢度嘅皮蛋有咩特別?係全國第一家冇加鉛嘅皮蛋。當然係健康好味之選啦!


燕麥片、雞蛋、布甸,全部都係宜蘭出產。佢哋都好犀利喎!完全可以自給自足~


仲有好多其他健康食品,數之不盡,價錢十分便宜。如果香港都有農會你話幾好呢?

掃完貨,就過隔離農村古農機具區參觀一下。有好多農業用具睇㗎!等我同大家逐一介紹啦!


風鼓 - 為以風力去除穀糠或雜物的清理器具


縫紉機 - 農村家庭家家戶戶都必備之縫紉器具


豬槽 - 以石頭打製槽狀餵豬的食具


石臼 - 石頭鑿成凹入的圓型槽、槽中可放穀類或其他食物,以搗子搗脫穀之器具


尿桶 - 為松蘿檜木箍成之木桶子,兩邊有穿孔之耳,待半桶時和以水,挑至菜園澆菜


蒸籠(左) - 過年過節,或家喜慶的日子,擔任蒸熟年糕、菜頭粿、發粿的任務
石磨(右) - 利用上下兩塊圓型石頭,將穀類或豆類食物磨成水粉或乾粉麵,然後加工製成食品


米籮 - 竹編器具,用於裝盛穀類等物品,並利用扁擔挑運


秧篦 - 以竹片及蔑編成,用於裝被鏟成一塊手掌大的秧塊,再運至小田邊


割耙 - 耕鋤之後,土地仍大小不勻,地面高低不平,必須用耙來耙之,碎其土塊,平其地面


犁 - 以畜力為動力,在人畜合作下,用於翻土、作畦、培土及開溝、施肥等工作

參觀咗咁耐,差唔多時候去DIY喇!想知我哋會整啲咩?一陣咪知囉!XD


養生觀光工廠提供多種唔同嘅DIY體驗活動~


有手工豆花、豆奶冰紛樂、鹽滷手工豆腐、鹹蛋超人、生態水世界、彩繪鑰匙圈、彩繪公仔、爆米餅手工禮盒、爆米香等體驗,朗朗揀咗佢喜歡食嘅豆腐花嚟DIY呀!


晴朗兩個黐埋一堆唔知做乜,不過保持好心情係好事嚟呀!


職員擺放咗好多唔同口味嘅豆奶響我哋面前,係咪畀我哋飲㗎?*o*


「羅董LOTON」有機豆奶勁多款式,如果可以試晒佢就好喇!*o*


課堂開始喇!職員先向我哋介紹有關羅東嘅故事同埋豆奶嘅知識。然後播放影片,等我哋了解多啲產品嘅製作過程~


試味時間到!Yeah!!! 真係畀我哋飲㗎!唔同嘅豆奶味道自然會唔同啦!由右至左,排列好較淡至較濃味嘅豆奶。識飲梗係由最淡味道開始啦!


試完兩支較淡味嘅,試到去中間果支,朗朗不停添不停添 ... 似乎搵到啱口味喇喎!^^


除咗豆奶可以試味,仲有不加鉛皮蛋都可以試。識食皮蛋嘅都知,靚嘅皮蛋會有雪花,加埋溏心。呢度啲皮蛋好靚囉!umm...仲要完全冇皂水味,健康又好味呀!

咦!好似唔見咗晴晴嘅?去咗邊度?


可能行程太緊密嘅關係,響DIY開始之前經已瞓著咗。好彩課室有張梳化畀佢抖抖啫!如果唔係就要抱足全程喇!^^'''

番番嚟課堂先!DIY豆腐花即將開始,活動特別為朗朗而設,好彩瞓果個唔係佢啫!XD


材料有水同埋一包粉,呢度整嘅豆腐花係唔落石膏粉㗎!取而代之嘅係梳打粉同埋我都唔記得咗一啲咩嘢粉,粉係由一啲天然材料撈製而成嘅!事不延遲,開始囉!


首先將粉放晒入容器內~


然後倒出適量嘅水在量杯內~


將水倒入容器~


水同埋啲粉一齊攪拌均勻~


最後將豆奶倒入,特別注意嘅係姿勢同力度,因為會好直接影響豆腐花嘅成敗。要快手快腳將樽豆奶180度倒轉就倒出,好似薑汁撞奶咁撞入去撈好嘅液體度~


豆奶係熱辣辣嘅!為保護雙手,倒嘅過程係需要戴上手套㗎!


話咁快就完成喇!Yeah!!!


而家要做嘅就係耐心等待,等豆腐花凝固好就食得!睇下朗朗嘅眼神係幾咁期待呢?^^


等咗一陣,攞匙羮測試一下,得咗!*o*


職員遞上一罐紅豆湯畀我哋,話加埋落豆腐花度食會更美味喎!


新鮮熱辣嘅紅豆味豆腐花整好喇!晴晴呢個時候先醒,都好及時喎!XD 冇加石膏粉嘅豆腐花同平時食開果啲好唔同,又滑又軟熟,啱晒朗朗口味啦!

食皮蛋、飲豆奶、DIY、購物樂,又過咗一個充實嘅下午喇!


米同皮蛋既然係特產,當然要買啲帶番屋企啦!


皮蛋一盒入面有四小盒,包裝得好精緻~


每小盒內有六隻皮蛋,係咪好奇怪點解皮蛋外層冇米糠包住,而且仲要隻隻乾淨企理呢?因為佢哋嘅製作過程同一般皮蛋唔同,實際點整我就唔知,不過知道佢哋係用一啲天然材料製作而成嘅!


雪花皮蛋呀!*o* 仲要每一隻都係咁靚喎!皮蛋質素十分高~


切開就見到溏心,正到冇朋友呀!


有啲人鍾意就咁切開食,有啲就可能會加醬油食,而我哋最鍾意加子薑片咁食呀!我唔客氣喇!^o^


宜蘭出產嘅稻米同日本珍珠米好似樣~


煮法有一條方程式㗎!無論幾多杯米,就加番幾多杯水,最後加多半杯水就可以煮得番宜蘭嘅味道喇!係咪好易煮呢?


雖然已經回港數天,但心仍在宜蘭,唯有食住宜蘭米頂住癮先啦!XD

現代人越來越注重健康,羅東鎮農會特別為健康飲食概念研發出多種食品,所以去到shopping係指定動作啦!(又有藉口購物)由於宜蘭仿效日本沖繩文化,產品包裝都特別有心思㗎!咁樣會更加刺激我哋消費喎!今次嘅DIY豆腐花係朗朗喜愛嘅食品之一,可以認識豆嘅蛋白質凝固過程,好特別!係好難得嘅體驗嚟!番到嚟香港食番宜蘭米同皮蛋,好回味宜蘭嘅味道呀!響觀光工廠食、買、玩都係用咗$905台幣,即係大約$241港紙咋!簡直係抵買又抵玩啦!想體驗宜蘭文化,又想購買健康好味嘅農產品,去羅東觀光工廠就冇錯喇!


羅東鎮農會養生文化觀光工廠
地址:宜蘭縣羅東鎮羅東鎮倉前路14號
電話:03-9574525
網址:http://luodong.diy.org.tw
facebook: https://www.facebook.com/loveloton
營業時間:09:00 ~ 17:00


FIND US on:
     

BLOGs:

CONTACT US: