2016年7月13日 星期三

澳瑪葡國菜 Alma Portuguese Grill

前排去完澳門,可能太掛住當地喇!一於去食番啲葡國菜,回憶番下澳門嘅味道先!
澳瑪葡國菜位於尖沙咀海港城,唔講仲以為係西餐廳嚟添!貢入去睇下囉~


餐廳主要以藍、白、黃色設計,仲有牆上嘅沙甸魚圖案,入到嚟就感受到葡萄牙風味喇!


地方寬敞,設計簡潔舒服。透過大玻璃窗可以望到開揚嘅景色,令人好放鬆呀!


坐窗口位可以望到天星碼頭同無敵海景,如果響呢度睇幻彩詠香江或者煙花咪好正囉?*o*


晴朗第一次見到咁大首郵輪,好壯觀呀!勁興奮~


落order之後,店員為我哋送上麵包和牛油,晴晴勁點牛油食,睇落好滋味喎!


炸馬介休薯球 - 去澳門一定會食馬介休球,估唔到而家響香港都有得食喇!勁開心!


薯球新鮮熱辣炸起,外脆內軟,馬介休又唔會過鹹,油而不膩,味道超讚呀!


炭燒霹靂雞翼 - 個名好勁喎!勁重蒜蓉味嘅醬汁微辣,第一啖食落去已經好有驚喜。值得推介!


葡式燴墨魚飯 - 切咗粒粒嘅墨魚配埋有豆豆同蔬菜嘅醬汁,用嚟撈飯唔錯,好啱小朋友食呀!


濃湯燴海鮮通粉 - 湯底鮮味濃郁,我哋唔只食晒啲餸同通粉,連個湯都飲晒呀!勁like~


葡國蛋撻 - 又係去澳門必食之選,不過呢度食到嘅同澳門果啲有啲分別。係因為餐廳堅持跟足葡萄牙風味,除外鬆內軟之外,味道會比一般甜啲,酥皮亦都做得簿啲。第一次食到正宗葡撻,大開眼界~


葡撻除咗堂食,門口仲有外賣添呀!


食番晒澳門嘅味道喇!yeah!!!


傢俬以淺黃色胡桃木為主,四圍嘅氣氛令人感到好溫暖舒適~


可能就係因為咁有「家」嘅感覺,吸引咗好多一家大小嘅家庭來幫襯,就響我哋隔離同埋對面兩枱都係有大有細,我哋真係冇嚟錯餐廳呀!

響香港主打葡國菜嘅食店唔多,我鍾意葡國菜嘅程度可以去到由澳門帶番啲外賣番嚟香港整番熱食,但而家唔駛喇!響香港都可以食到新鮮出爐嘅葡國菜,實在係大滿足!好欣賞呢度嘅service,由坐低開始店員已經不停撩晴朗傾計、講笑,落order同上菜服務都好有效率。服務咁有熱誠,好抵讚呀!等下次挑起條癮嘅時候,我哋又會再來感受過澳門嘅味道。


 澳瑪葡國菜 Alma Portuguese Grill 
地址:尖沙咀廣東道17號海港城海運大廈3樓OT310號舖
電話:31883668
facebook:https://www.facebook.com/almahongkong