伊斯坦堡特快 Istanbul Express Turkuaz Turkish Restaurant

我哋平時去嘅餐廳都不外乎港式、日式、泰式、意大利菜、麥記快餐...等等啦！今次不如去食啲另類啲嘅嘢丫！聽聞尖沙咀有間土耳其餐廳啲嘢食幾好味㗎喎！跟貼啲，跟住我哋嚟啦！
餐廳位於一個唔多顯眼嘅角落、人流唔多嘅商場，好神秘呀！*o*

門口凍櫃放滿好多唔同款式嘅土耳其酒類，仲有甜品添！

環境舒適，牆上掛住嘅裝飾富有土耳其特色

木枱、木櫈、紅椅墊，平實嘅裝修，感覺就好似置身於土耳其嘅小餐店咁~

天花上精美嘅吊燈好靚呀！

我哋被安排坐窗口位，正！

肚餓喇！order一下先~

土耳其扁豆湯 - 扁豆湯響土耳奇好出名，亦都好啱素食者享用。濃郁嘅豆湯夾雜住一啲豆渣，好rich，好特別！

土耳奇式厚包餅 - 麵包就食得多喇！土耳奇嘅真係第一次。個包食落厚實好重麵粉香，啱晒我哋呢啲澱粉怪啦！邊飲湯邊用包點啲湯嚟食，仲好味呀！

轉轉燒雞肉卷 - 雞肉係取自土耳其轉燒式嘅雞肉片，配埋生菜、洋蔥、蕃茄用麵餅包卷住咁食，唔錯喎！

炸芫芝士春卷 - 春卷比較幼身，饀料係西芹碎加埋啲濃郁嘅芝士漿，溶住咁入口兼脆卜卜，好有口感呀！

睇下我哋食得幾happy~ XD

上甜品喇！呢個係土耳奇傳統嘅特式米飯布甸(Rice Pudding)，唔好睇個樣冇咩特別咁，其實內有乾坤~

「不」一啖比大家睇下啦！個樣有啲似乳酪，食落甜甜酸酸有啲似米糊，唔錯㗎！好快就比我哋清晒lu~

最後嘆番杯土耳奇熱紅茶(左)同埋熱蘋果茶(右)先~

蘋果茶就肯定冇我份啦！好快比人KO咗喇！

仲有土耳奇檸檬特飲呀！酸酸甜甜好開胃~

大家如果有興趣去試嘅話，睇定餐牌有咩啱食啦！(以下所有圖可按圖放大)

餐廳由土耳其廚師主理，冇華麗嘅裝修，食物賣相亦都一般，但估唔到就係好好味。有時出去食嘢會遇到賣相好但味道唔好嘅經歷，如果比我揀，令願實際啲喇！始終係食落自己肚嘛！去過土耳奇旅遊嘅朋友同我講差不多日日都係食呢啲卷餅類食物，嚟到呢度，可以回味番當年旅行嘅回憶，感覺十分好！我哋就係鍾意佢唔會好花巧，較為平實嘅一間食店，比起貴啲去食靚裝修嘅來得經濟化算。今次因為同行嘅朋友唔食羊所以冇order，有機會都想試埋佢哋嘅羊肉米飯，用正忠土耳奇米整㗎！堅想試！

 伊斯坦堡特快 Istanbul Express Turkuaz Turkish Restaurant 
尖沙咀店：尖沙咀新文華中心1樓115-120號舖 電話：25200400
灣仔店：灣仔駱克道66號地下舖 電話：28650066
灣仔碼頭店：灣仔灣仔渡輪碼頭W2號舖 電話：37912602