2016年7月15日 星期五

手足口病

一直以來都好多朋友問我小朋友患咗手足口,點算呀?有咩要注意?仲記得3年前晴朗同埋我響同一時間齊齊患上手足口,就等我以一個過來人嘅身份叮囑一下大家有咩需要注意啦!不過係一個好慘痛嘅經歷嚟呀!~~~

11/8/2013 星期日
估唔到星期五先收到學校通知確診咗一個手足口病個案,今朝朗朗就開始發燒喇! 我哋同朗朗去咗仁安睇急症,醫生一照佢喉嚨就發現生晒水pop,亦確診埋手足口,需要留院治理。我喉嚨都唔舒服咗兩日,叫醫生順便睇下,原來我都中咗招,今次真係同朗朗同病相憐喇!/_\


晚上陪朗朗住院,由於手足口病屬高傳染性疾病,我哋被安排咗入住單人房。今晚情況尚可,食到嘢同飲咗好多水,亦去咗好多次廁所,啲燒都開始退番啲喇!但凌晨時份又再度高燒,我都唔記得食咗幾多次退燒藥喇!總之一瞓著又比姑娘叫醒要餵朗朗食藥同檢查啦!完全冇覺好瞓~


朝早睇番張記錄表先發現原來朗朗一直持續高燒,可能因為瞓咗覺冇乜飲水嘅關係啦!

12/8/2013 星期一
朗朗好想出院,醫生嚟循房時話雖然啲燒未退晒,但都會有可能燒多1至3日,暫時冇咩做到。我同老公商量過後,決定比朗朗出院,希望佢響屋企休息得好啲會快啲好番。結果下午在仍然有燒嘅情況下,出咗院。而我嘅情況就越黎越壞,唔好話食嘢啦!直頭連飲水個喉嚨都痛到不得了。天呀!健康幾時先至番嚟我身邊?X_x

13/8/2013 星期二
朗朗由尋晚凌晨至今朝都冇發過燒喇!但不幸嘅係同我一樣,佢喉嚨啲水pop導致開始食唔到嘢,連飲水都話好痛!咳都多咗,咳時聽到有痰聲。於是我帶佢去睇西醫,醫生開咗化痰止咳、止痛同埋手足口特效藥,朗朗食咗止痛藥就食得番嘢喇! 唔講真係唔知原來手足口都有特效藥,醫生話可以幫手舒緩病情。希望真係幫到手啦!禍不單行,晴晴開始發燒喇!我哋想再睇定啲先帶佢去睇醫生,所以食住退燒藥先~

14/8/2013 星期三

朗朗情況開始好轉,食同飲都ok喇!

晴晴情況開始惡化,手腳出現大量紅點同水pop,而且開始食唔到嘢。好大機會係比我哋傳染咗手足口病啦!相同嘅病發生在晴晴身上反應比較大。我即時同佢去咗瑪嘉烈急症,醫生話暫時見佢冇脫水現像,開住啲退燒藥先。如果過幾日情況惡化再番嚟,睇下駛唔駛留院吊鹽水。晴晴今日全日靜係食咗好少量既粥同豆腐花,水飲得極少。飲奶嘅時候好痛,所以完全冇飲過奶。我見到佢想食但又食唔到嘅樣,好心痛呀!

15/8/2013 星期四
晴晴今日飲水ok喇!但食嘢同飲奶都仍然係痛,我哋唯有用針筒打啲奶比佢飲。見到佢食嘢嘅時候個痛苦表情,真係心痛死人。今日全日靜係飲過十幾安奶,希望聽日會再好啲啦!

16/8/2013 星期五
今日情況好番好多喇!一朝早可以自己用奶樽飲晒5安奶奶,好叻,我哋都好開心呀!


飲完奶仲心情好好響度玩

晴晴大致上都回復正常,冇發燒,又食同飲得番嘢。手腳啲水pop都開始結焦喇!真係大好消息呀!而我嘅情況就因為加上上星期開始嘅牙肉腫痛,所以好得比較慢。不過今日都開始冇咁痛,食得番嘢,有番啲胃口喇!


朗朗都好得七七八八,仲好有胃口響度食蛋糕添!

17/8/2013 星期六


今朝早同晴朗兩個落咗平台呼吸新鮮空氣,病完一場要去玩下先得呀!


健康真可貴,能夠見到小朋友活潑動人咁玩,感覺實在太失而復得,要好好珍惜健康呀!


健康番番嚟我哋身邊喇!

每次病嘅時候,更覺健康可貴。今次嘅病唔係一般傷風感冒咁簡單,手足口病真係唔講得少,令我哋一家人整個星期陷入咗黑暗歲月。手足口簡直係世紀惡疾呀!而家就等我介紹多少少有關手足口病既資料:


患咗手足口病其實最可怕係中左71型,因為佢嘅併發症可以導致好嚴重嘅後果。但多數患者都唔係71型,都可以靠自己嘅免疫力去打低啲病菌


初期,手、腳甚至身體會出現紅疹同水pop。我同朗朗冇呢個徵狀,但晴晴就出疹得好嚴重,手、腳以至全身都出咗好多紅點,有啲仲要係穿咗水嘅水pop黎添!1~2日後會因口腔嘅水pop導致痛到食唔到嘢。2~3日後會慢慢食得番嘢,整個階段係最痛苦嘅時期~


主要係由口水或鼻水傳染~


潛伏期3~7日


暫時都冇乜藥係專治手足口,都係靠飲多啲水同多休息等個病好。患病期間唔適合番學,亦唔好去人多嘅地方。等口腔所有水pop冇晒,手腳果啲又結晒焦先可以回復番正常生活呀!

經歴今次一疫,好似打咗一場好轟烈嘅仗咁,我哋一家都好疲累。病菌病菌,請你哋遠離我哋,短期內都唔好再嚟我哋家喇!雖然話小病是福,但相信我哋一家都需要一段長時間去回復元氣。

**************************************************************************************

透過我哋嘅經歷分享,希望幫到正在對抗手足口病菌嘅媽媽啦!就算小朋友未患過,都需要注意呢個病,因為傳播性太高,實在係不容忽視。晴朗之後都有再次患手足口嘅經歷,但相對第一次嘅病情,反應較為輕微。做好衞生好緊要!在日常生活中應該時刻注意勤洗手、做好家居清潔以及食物唔好共食。預防措施做得好,病菌就唔會咁容易搵上門啦!