2016年9月27日 星期二

樂高®星球大戰™︰巨型千歲鷹™拼砌活動

如果你身處於海港城或鄰近地區,有冇感受到一股好強大嘅力量呢?呢股力量係來自每個有份參與「巨型千歲鷹拼砌活動」嘅家庭,我哋幸運地被LEGO抽中參與其中。一齊嚟睇下活動嘅熱鬧盛況啦!
到達現場,見到好多家庭努力拼砌中喇!我哋都快啲加入行列囉!~


嘩!未入場已經見到好大部壞人戰機(tie fighter)。身為星戰迷嘅朗朗點會唔興奮呀?


入場後,見到迷你版嘅千歲鷹,雖然話迷你咋!其實size都大過一張枱㗎!


巨型千歲鷹嘅外形已經砌好,係我哋發揮原力嘅時候喇!


齊心便事成!星戰小戰士們要加油呀!


朗朗二話不說已經唔講嘢,專心一致拼砌組件喇!


黑色組件其實並唔難砌,只要跟說明砌高4層就完成~


登..登~ 第一件組件完成


千歲鷹嘅底部需要大量組件,繼續努力啦!


我哋已經砌咗多件喇!yeah!!!


跟住領航員嘅指示,朗朗幫手拼砌啲組件落去巨型千歲鷹度。原力又上升喇!


砌完黑色,不如試下砌灰色組件囉!


其中一位領航員都來到為我哋打打氣呀!so funny~


呢位領航員係來自澳洲嘅樂高拼砌達人,見到佢咁落力,戰士們都士氣高昂呀!齊心務求盡快完成香港第一艘巨型千歲鷹~


朗朗四處環顧同欣賞自己有份砌嘅部份,好有滿足感!


臨走,領航員仲送咗份lego小禮物畀朗朗添,開心到佢個樣丫!


完成使命,去領取樂高星戰拼砌證書囉!


「巨型千歲鷹?我有份砌㗎!」yeah!!!


食飯嘅時候,已經急不及待要開包小禮物嚟玩喇!但其實係砌乜嘢㗎?


「招~ 招~ 招招~ 呢部咪X-Wing囉!咁都唔識?」(呢啲男孩子玩意,唔識好出奇咩?@@''')


仲向我展示當要應戰嘅時候,X-Wing就會變成「X」形添!(睇怕晴朗媽媽都要惡補下先得喇!XoX)


憑住超過千人嘅努力及三位領航員嘅帶領之下,用咗19小時及超過20萬顆LEGO顆粒。香港第一艘巨型千歲鷹隆重登場喇!Woo~ HOoooo~~~


靜係睇相,已經感受到果份震撼喇!

我哋plan梗時間去現場親身感受下,如果你都想知道呢艘全銀河系最快嘅飛船有幾巨型,就快啲嚟到海港城睇下啦!


 樂高®星球大戰™︰巨型千歲鷹™正式登場 
活動地點︰尖沙咀海港城海運大廈地下中庭
活動日期:2016年9月25日至10月13日