2017年2月21日 星期二

【酒店級水準】Unique Cafe Kitchen

相約好友聚會,梗係想食好啲啦!但係帶住小朋友,怕佢哋悶,又或者搞搞震冇幫襯,點算好呢?聽講觀塘工廈最近開咗間親子餐廳喎!Really??? 有得玩又有得食,一於去試下囉!
齋睇門面,好明顯係西餐廳嚟啦!行囉!行囉!晴晴已經催梗我喇!^^


又裝修得幾骨子喎!水吧有各式各樣嘅酒,汽水同酒杯都排放整齊,好似做display咁呀!


地方大,座位又多。環境唔錯!


開放式廚房都幾乾淨企理喎!仲可以睇住廚師煮嘢添!


咩咁興奮呀?原來行到最入有間兒童遊戲室呀!*o*


嘩!小朋友至愛嘅波波池!發達喇!


除咗波波池,仲有各式各樣嘅車車~


連廚房玩具同lego都有齊,實有排玩喇!^o^


事不延遲,晴晴已經展開咗搜索行動!gogogo~


不停響通往滑梯嘅通道來來往往玩咗好耐,妳唔攰我都攰喇!^^'''


仲當咗樓梯係滑梯咁瀡,有冇搞錯到呀?滑梯響果邊至啱喎!XD


3條相連滑梯加波波池,係咪好吸引呢?啲波波滿到就瀉喇!正呀!*o*


從上望落去,好想即刻就瀡番轉,感受下呀!


晴晴話想讓車車瀡先喎!原來睇住車車滑落去都好有趣味㗎!


又話一齊瀡嘅?點知晴朗媽媽心急得滯,滑咗落去先,晴晴唔好笑我啦!XD


滿到瀉嘅波波池特別好玩,睇反應就知啦!^^


「媽媽想食咩呀?我煮畀妳食丫!」,又係需要媽媽交戲嘅時候喇!「好呀!一份煎蛋丫!唔該!」^^


wheels on the bus go round and round... 玩車車時間囉!thomas車車可以帶住晴晴四圍去,幾開心?^o^


砌下lego發揮無限創意,晴晴想砌一度隨意門呀!


呠呠!前面發生交通意外,大塞車。弊加伙喇!~


其實每個小朋友都一樣咁鍾意波波,將啲波運嚟運去都好好玩。晴晴同在場嘅小朋友一齊玩得好開心呀!仲歡天喜地出嚟同我講認識咗新朋友添!哈哈!


兒童遊戲室需要進行清潔,小朋友可以暫時番埋位休息下~

玩咗咁耐,都係時候要醫醫肚喇!我哋啲食物已經陸逐上枱lu~


三文魚沙律 - 煙三文魚同蔬菜都好新鮮,配埋蜜糖芥末醬汁好開胃呀!晴晴就最欣賞面頭紅色一粒粒果啲神石榴肉,入口爆汁果下的確幾過癮。酸酸甜甜咁,為我哋嘅午餐揭開咗序幕呀!


第二味上枱嘅係炸雞翼。初頭仲以為炸燶咗添!原來係啲秘製醃料比較深色,唔係燶嚟㗎!但我明明係叫雞翼,點解會變咗雞膇嘅呢?個肚打晒鼓,都係食咗先諗~ XD


嘩!哈!晴晴至鍾意食雞翼。我哋唔客氣喇!


咦!有發現喎!原來真係雞中翼嚟㗎!


只不過係將雞翼去剩一條骨,再將啲肉推晒去前面。食晒啲肉就只剩下一條骨,咁樣整又幾啱小朋友食喎!不過好考廚師手勢,事前功夫都唔少。必食推介呀!


烤法國春雞配燒烤汁 - 燒春雞半隻,皮脆肉嫩,配埋秘製醬汁,好好味!晴晴不停添,佢真係好鍾意食雞。XD 尤其係隻雞已經去埋骨,咁就更加啱食喇!


晴朗媽媽偏向鍾意食海鮮,蝦係我嘅至愛。呢味煎大蝦靜係賣相已經夠吸引喇!大大隻蝦肉爽滑彈牙,龍蝦牛油忌廉汁又同海鮮好夾。鍾意食蝦嘅朋友一定要試試~


海膽忌廉汁意大利粉配鮮蝦、露荀 - 由新鮮海膽加牛油煮出嚟嘅忌廉汁好特別,本身鍾意食海膽嘅晴朗媽媽更加流晒口水啦!umm...好creamy呀!味道比起一般嘅白汁好味,更加帶出咗海鮮嘅鮮味。又係愛蝦之人必食推介!


成枱都係美食,好豐富,我都要啟動喇!wo~ hoo~


好友相伴,又有豐富美食。真係想講番句:「人生得一知己....」。新年流流,都係唔好死死聲喇!XD 總之大人同小朋友都好滿足啦!^^


去洗手間嘅時候留意到好多high chair,果然細心。餐廳嘅target好明顯啦!


仲有埋換片設施添!真係照顧周到呀!


近門口位置有玩具同兒童用品售賣,晴晴對佢手上嘅大笨象愛不釋手~ Roar}}}


唔同款式嘅襪都有,唔記得帶襪入場都唔怕啦!


清潔完畢,又可以盡情暢玩囉!woo~ ho~~

有興趣嘅朋友,可以睇定餐牌有咩心水啦!

兒童餐 (可按圖放大)


Lunch Menu (可按圖放大)


頭盤 (可按圖放大)


意粉類 (可按圖放大)


意大利飯類 (可按圖放大)


小食類 (可按圖放大)


甜品 (可按圖放大)


飲品 (可按圖放大)

今次嚟Unique Cafe主要係因為餐廳設有兒童遊戲室,有啲嘢畀小朋友玩下冇咁悶嘛!真係冇諗過食物質素會係咁好,簡直係酒店級水準。好surprise呀!

餐廳一向主理有質素嘅西餐,原來係最近先將原先嘅VIP房改建為兒童遊戲室。改建後不但多咗人帶埋小朋友嚟幫襯,生意仲好咗添!我哋lunch都見到好幾枱family,一家大細嘅又有,兩三個媽媽帶埋bb嚟玩嘅都有。

餐廳嘅轉營對於有小朋友嘅朋友嚟講絕對係好事。又多個親子好地方,實在太好喇!下次要帶埋朗朗同晴朗爸爸嚟先得!我見到佢哋仲有包場服務,度一度期,響度搞番場party都好喎!不過要提提大家,餐廳逢星期二休息,唔好摸門釘喔!


 Unique Cafe Kitchen 
惠顧滿最低消費,可免費入遊戲室
星期一及星期三至五
12:00~15:00 成人$118,小童$58
15:15~18:00 成人$118,小童$58
18:30~22:00 成人$158,小童$78
星期六、日及公眾假期
12:00~15:00 成人$128,小童$68
15:15~18:00 成人$128,小童$68
18:30~22:00 成人$178,小童$88

地址:觀塘巧明街114號迅達工業大廈2樓B室

電話:2126 7279
facebook:https://www.facebook.com/Uniquecafekitchen

沒有留言:

張貼留言