2017年8月3日 星期四

【隱世好味】糧心製作 Goodwill Production

自小響南區長大嘅我,對於呢區嘅大街小巷都好熟悉㗎!通常要搵好嘢食,多數會去香港仔。不但選擇多,食飽又多商場可以行下。但講到工廠林立嘅黃竹坑,感覺就好似冇咩好食。Hey~ 咁諗就錯喇!我哋最近發現咗一間價錢合理又高質素嘅餐廳正正就位於呢區。食到好嘢,梗係要介紹畀大家啦!去開呢頭嘅朋友,一定要試試呀!
「糧心製作」位於黃竹坑一座工廠大廈嘅樓上小店,位置並不起眼,附近又冇宣傳海布,真係唔講都冇人知~ @.@


第一次嚟幫襯,唔係好熟架步,只見餐廳門外放咗幾份餐牌,仲有黑板上寫有不同菜式~


平時只會響酒店餐廳或較高質素嘅西餐廳先見到嘅菜式,竟然響工廠大廈嘅餐牌出現?


枱頭一望,仲有三個大黑板寫上滿滿的西餐菜式。湯、沙律、飯、意粉、All day breakfast都一應俱全。花多眼亂,選擇困難症又發作喇!XD


餐廳門外寫有聖經章節,相信老闆都係基督徒嚟喎!


入到餐廳內,有一個開放式廚房同收銀處。見唔到有枱櫈畀客人坐低食嘢,唔通只做外賣?有一刻懷疑過自己係咪去錯咗地方~ ^^'''

經向店員查詢後,原來落order係一個地方,用餐又係另一個地方。好彩冇搞錯啫!


落完order,店員教我哋通過長長嘅走廊,行到尾就係另一個單位可以坐低慢慢嘆~


步行途中,經過見到餐廳放響走廊嘅溫聲提示。清楚列明餐廳規舉,好搞笑!又寫得幾可愛老實~


單位門外貼有餐廳菜式嘅相片,一睇就知係呢度,唔會搞錯!


推門而進,見到有枱有櫈,終於鬆一口氣。有番啲餐廳嘅感覺喇!


基本上呢度冇咩裝修,只有幾張枱和櫈,同埋一個簡單嘅水吧~


望出窗外亦冇咩風景睇,但好高呀!建議畏高嘅朋友唔好睇喇!XD


店內放置咗好多唔同嘅擺設,除咗動漫figure外,仲有好多漫畫。相信全部都係店主嘅私人珍藏嚟啦!


坐低冇幾耐飲品就到喇!可以先解解渴,透心涼呀!


即叫即煮嘅嘢!當然要耐心等待。咁就邊嘆嘢飲邊睇住電視等啦!


西班牙黑毛豬扒 $80 - 豬扒煎得好香,肉質鬆軟可口,配埋秘製醬汁好好味!


龍蝦海鮮意大利飯 $138 - 用料好新鮮!尤其係隻龍蝦爽口彈牙,好有鮮味!飯粒煙韌,個汁亦煮得好creamy呀!


食飽又可以繼續hea下,借本漫畫睇下先!中學之後都未睇過喇!XD


原來仲有一啲遊戲借嚟玩,正喎!下次帶埋晴朗一齊嚟都唔怕悶啦!


店內有免費wifi提供,呢樣好重要,又可以慳番啲流動數據喇!XD

「糧心製作」認真冇改錯名,果然用心製作,係現今少有嘅良心食店。食物足料、有質素、多選擇、服務又ok,最重要係價錢唔貴嘛!雖算不上係頂級,但食得出老闆同廚師嘅用心,無論有幾多單排梗隊,都堅持要擺到靚一靚先上碟。好有熱誠,值得支持!啖啖滋味,啖啖滿足,等耐少少都值得啦!呢度冇華麗嘅裝修,亦都冇昂貴嘅傢俬,只有一份用心嘅製作。糧心製作,物超所值!下次嚟!想試埋佢哋出名嘅西多士同埋周打蜆湯呀!


 糧 心 製 作 
地址:黃竹坑業勤街35號金來工業大廈第1座25樓N室
電話:2889 6528
facebook: https://www.facebook.com/goodwillproduction


FIND US on:
     

BLOGs:

CONTACT US: