2017年8月22日 星期二

【綠茶控必試】Ideas Dessert

甜品店我哋就幫襯得多喇!但能夠同時提供埋軟雪糕嘅好似冇幾多間,仲有好多綠茶甜品添呀!一眾綠茶控又點可以錯過?跟貼啲,跟住嚟啦!
ideas Dessert係一間位於荃灣嘅甜品小店,位置人流唔算多。嘆綠茶甜品居然唔駛排隊?一於入去試試佢哋嘅手勢囉!


店內座位區呈L形,約有6張枱,廚房佔咗大部份位置。晚上6點幾,只有1枱獨個兒嘆甜品同埋1枱約5-6個學生哥嘅客人。事不延遲,我都要為自己挑選一下先~

翻開餐牌,甜品款式好多,花多眼亂之下,選擇困難症又發作~


嚟呢度嘅目的係想嘆綠茶甜品,目標已經鎖定喇!(可按圖放大)


但係綠茶都有好多款,有啲配有小丸子、綠茶餅,亦有同綠茶絕配嘅紅豆,究竟點揀好呢?(可按圖放大)


除軟雪糕款外,仲有心太軟。試埋佢囉!XD (可按圖放大)


千層酥都好吸引呀!睇到流晒口水喇!(可按圖放大)


仲有刨冰添!啱晒呢啲熱屎辣辣嘅天氣啦!(可按圖放大)


芭菲杯都好似唔錯!但我絕非細食之人,似乎唔多夠食喎!XD (可按圖放大)


榴槤甜品呀!嘩!*o* 對於榴槤大愛嘅我,好心動囉!(可按圖放大)

但係唔好忘記今次嚟嘅目的,唯有忍一忍啦!>o<


抹茶沙冰都未試過喎!仲有其他款式嘅飲品添!(可按圖放大)


甜品種類繁多,如果仲未揀啱心水嘅,不妨睇睇頭10位暢銷榜啦!(可按圖放大)

好忍心咁放棄咗一啲大愛,終於揀好三款甜品~

響等待嘅時間,留意到貼響牆上嘅小告示~


亮點不在於告示內容,而係睇到下方嘅署名笑咗!究竟邊位係家明表哥呢?@.@

諗諗下我嘅甜品就上枱喇!Waaa~ *o*


宇治金時 - 雪糕十分幼滑,抹茶味香濃,茶味十足,味道唔會太甜,啱啱好!配埋小丸子同紅豆,煙煙韌韌嘅味覺,簡直係冇得彈呀!


招牌抹茶心太軟 - 朱古力心太軟就試得多,抹茶味都係第一次。同宇治金時一樣配有紅豆+小丸子,不同之處係多咗一球豆腐雪糕。起初不以為意仲估係雲呢拿味嚟添!食落淡淡嘅豆腐味同抹茶好夾呀!


Wow~ 心真係太軟喇!用匙羹一切就流晒啲抹茶溶漿出嚟!I like it~ *o*

抹茶味好出!加埋雪糕一冷一暖咁食,在口中融合果種感覺好味到難以形容~

原來除咗朱古力心太軟外,抹茶味都咁好味!又擴展咗味覺嘅新領域喇!


抹茶千層酥 - 上枱嘅一刻好震憾!尤其係啲紅豆流出嚟果一下,好誘人呀!


酥皮夾住嘅係抹茶cream同埋紅豆,賣相好吸引!


千層酥仲配有綠茶餅同豆腐雪糕。將個酥切小件,加少少雪糕逐件放入口,香脆嘅酥皮同抹茶紅豆混為一體。再次感到冷暖融合嘅味道,好AMAZING!!! 今次真係大滿足呀!

Ideas Dessert特別在提供一般糖水舖嘅甜品之餘,仲有埋軟雪糕款式。而且每款甜品都有獨有名稱,店主好細心呀!之前真係冇諗過甜品小店都可以製作出咁出色嘅抹茶軟雪糕,但試過之後真係一試難忘,我而家都變咗佢哋嘅常客喇!減肥計劃已經無限期擱置。上網一search發現原來佢哋響旺角設有分店,有機會要帶埋晴朗一齊試埋分店,試埋其他款式呀!當然包括埋我大愛嘅榴槤甜品啦!一於咁話,不見不散!


Ideas Dessert
總店:荃灣荃貴街10A號富麗花園商場A座地下13B及15號舖 電話:37912128
分店:旺角豉油街126-128號明威閣地下K鋪 電話:39569596
facebook: https://www.facebook.com/ideas.dessert


FIND US on:
     

BLOGs:

CONTACT US: